Muellerip nalunaarusiaa: Trumpip Ruslandillu suleqatigiissimanerannut uppernarsaatissaqanngitsoq

USA-p præsidentiata Donald Trumpip qineqqusaarnermilu sulisuisa Ruslandimiut suleqatigipilullugit USA-mi 2016-imi præsidentimut qinersinermik sunniiniarsimanerannut uppernarsaatissarsisoqanngilaq.
Præsidentip nalunaarusiaq imminik pinngitsuutitsisutut taavaa. Asseq toqqorsivimmit Assi © : Gage Skidmore/Flickr Creative Commons
Allattoq Ritzau
marsip 25-at 2019 11:30
Nutserisoq Simon Uldum

Immikkut ittumik unnerluussisussaatitaasup Robert Muellerip inaarutaasumik nalunaarusiaata tunniunneqarnerata kingorna Amerikamiut inatsisinik atuutsitsinermut ministeriat William Barrs taama inerniliivoq.

Præsidentimut qinersineq, Hillary Clintonip Trumpimut ajorsarfigisaa, russinit sunnerniarneqarsimasutut pasitsaassaqarfiginera unnerluussisussaatitaasup ukiuni marlunni misissuiffigaa.

Nalunaarusiamilu inerniliussat pingaarnerit imaqarniliarineqarnerat kongressimut sapaatiummat unnukkut tunniunneqarput.
Præsidentillu nalunaarusiaq imminik pinngitsuutitsisutut taavaa.

- Suleqatigiittoqanngilaq, akornusersuisoqanngilaq, qularutissaanngitsumillu pinngitsuutinneqarpunga, Twitterikkut taama allappoq.

Aviisi The Guardian naapertorlugu William Barrsip Robert Mueller issuarlugu oqaatigaa Trump pisuussuteqarnersoq imaluunniit pisuussuteqannginnersoq nalunaarusiami inerniliunneqanngitsoq.

Taamaammat demokraatit kongressimi siuttuisa nalunaarusiap tamakkerlugu saqqummiunneqarnissaa piumasaraat.

- Præsidentip pissaanermik atornerluisimasutut pisuutinneqarnerminik Muellerip nalunaarusiaani pinngitsuutinneqannginnera nalunaarusiap tamakkerlugu saqqummiunneqartariaqarneranik uppernarsaatissatullu atorneqartut kinguarsarneqaratik tamanut saqqummiunneqartariaqarnerinik ersersitsivoq, tusagassiorfinnut nalunaaruteqarlutik taama allapput.