Præsident Trumpip peqqussut Det Hvide Husimi novembarimi nalliuttorsiornermi atsiorpaa. Præsidentip indianerit siuttui nalliuttorsiornermut qaaqquai, naggueqatigiilli inuit siuttui qaaqqunagit. Toqqorsivimmit assiAssi: Ansgar Walk, via Wikimedia Commons

Trumpip nunat inoqqaavisa arnartaasa toqutaasimanerisa misissuiffigineqarnissaa aallartikkaa

Ataatsimiititaliap immikkut ittup USA-mi nunap inoqqaavinit arnat periarfeerunneqarsimasut toqutaasimasullu pillugit suliarpassuarnik misissuisussap pilersinneqarnissaanut peqqussut præsident Donald Trumpip atsiorpaa.

Ataatsimiititaliaq nutaaq USA-p inatsisinik atuutsitsinermut ministerianit William Barrimit siulersorneqassaaq, ataatsimiititaliarlu amerikamiunit indianerinit naggueqatigiinniillu arnanit kimigiisissuteqarnerup kinguneraa.

Ataatsimiititaliaq immikkut ittoq suliat taamaattut qanoq misissuiffigineqartarnissaannut aallaqqaasiutigalugu malittarisassiussaaq.

AAMMA ATUARUK USA nunat inoqqaavisa arnartaasa nakuuserfigineqartarnerannut akiuunniaqataalersoq

Ataatsimiititaliaq Canadami misissuinissamut ataatsimiititaliatulli angalalluni arnanit oqaaseqatigiinit tusarnaariartortarluni angalassanngilaq, atorfilittatigoortumilli pissutsit qanoq misissuiffigineqartarnissaannik erseqqissaanerussalluni.

Nunap inoqqaavisa arnartaat 1,5 millioninit amerlanerusut nakuuserfigitinnermik ilaatigut kinguaassiutitigut nakuuserfigitinnermik nalaataqarsimasut USA-mi inatsiseqarnermut ingerlatsiviup missiliorpaa. Nunallu inoqqaavisa arnartaat arnanut allanut sanilliullugit quleriaammik amerlanerusut toqutaasarlutik.

Arnat taakku amerlanerpaartaat angutinit indianeriunngitsunit naggueqatigiinniillu inunninngaanneersuunngitsunit nakuuserfigineqartarput.

Præsident Trumpip peqqussut Det Hvide Husimi novembarimi nalliuttorsiornermi atsiorpaa. Præsidentip indianerit siuttui nalliuttorsiornermut qaaqquai, naggueqatigiilli inuit siuttui qaaqqunagit.

AAMMA ATUARUK Arnat toqutaasimasut pillugit nalunaarusiaq piareertoq

Tamatuma kingorna eqimattat namminneq suliniutiminnik ineriartortitsipput. Naggueqatigiit inuit arnartaat Alaskami Kotzebuemi katersuuttut BBC-p sapaatip akunnerani matumani takutippaa, arnat taakku nammineq suliniuteqarnerminni sumiiffimmi suliat pillugit tusarniaapput iliuuseqarniarunarlutillu.

Trumpip suliniutaa aallarniutaavoq. Amerikamili nunap inoqqaavisa arnartaasa Canadami tusarniaaffigineqaqqissaarnerminnik pissarsinissaannut piffissaq suli sivisussaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat