Trumpip franskit præsidentiat ataatsimeeqatigissagaa
Danmarks Radiop ilanngutassiortua Stefani Surruge oqaluttuarpoq naalagaaffiit aquttuisa taakku Syriami killiffik eqqartoqatigiissagaat. Præsidentit marluullutik isumaqatigiissutigaat akuutissat ulorianartut atorlugit Bashar al Assadip saassusseqqinnissaa nunat assigiinngitsut akornanni akuerineqarsinnaanngitsoq. Oqaloqatigiissutigissavaattaaq Islamisk Statip peqqarniisaarniarullu akiornissaat.
Aamma silap pissusaa oqaloqatigiissutigissavaat. Naallu Donald Trumpip nalunaarutigisimagaluaraa sila pillugu isumaqatigiissummit aniniarluni, Emanuel Marcron nalunaarsimavoq Trump Parisimi isumaqatigiissummut peqataalersinniarsareqqinniarlugu.
Taamaakkaluartoq Franskit amerikamiullu tusagassiorfii aquttut ataatsimeeqatigiinnissaannut assut isumalluarput, isumaqatigiissutigaallu Trump Europamut ajunngitssumik attaveqarusuttuusoq.
Angela Merkelimulli attaveqarnera pitsaavallaanngilaq.
Theresa Mayilu qinersinermi ajorsarnermi kingorna Tuluit Nunaatalu EU-mit aninerata kingorna pingaaruteqarpallaarani.
Politikkikkulli alaatsinaattut naliliiput Donald Trumpip Macron soqutigigaa, nuannaralugu EU-milu siunissami aquttutut nukittuutut inissillaqqugaa.
Taamaattumik Trumpip tikeraarnerata kingunerisinnaavaa Frankrigip USA-allu akornanni pitsaanerusumik attavigiilerneq, imaluunniit aamma USA'p EU-llu akornanni attaveqatigiilluarnerulerneq.
Trump Franskit inuiattut ullorsiorneranni - Bastillemi aqagu peqataassaaq.