Trumpip Cuba aniguisinniaraa tiguarniaraaluunniit
USA-p præsidentiata Donald Trumpip Cubap tiguarneqarnera ataqqinaatissatut isigaa.
Præsidentip illorsuani tusagassiortunut ataasinngornermi taama oqarpoq.
- USA Cubalu pillugit inuunera tamaat tusagaqarnikuuvunga, qaquguuna USA taamaaliorniartoq? Trump oqallorissaarpoq.
- Isumaqarpunga Cubamik tiguaanermik ataqqinaat uanga pissarsiarissallugu, Trump oqarpoq.
- Aniguisissanerpara tiguassanerparaluunniit, isumaqarpunga piumasara naapertorlugu iliorsinnaallunga. Piviusoq paaserusuppisiuk? Inuiaqatigiit taakku maannakkut sanngiillingaarsimapput, Trump oqarpoq.
Præsidentip oqaasii qanoq paasisariaqarnersut erseqqinngilaq.
Trump Cubami naalakkersuisut allanngornissaannik kissaateqarnerminik siusinnerusukkut oqaaseqarpoq.
Cubami kommunistit naalakkersuisui ukiuni 70-ini USA-mut akerliusimapput, ilaatigut Ruslandimut qanittumik attaveqarlutik.
Innaallagiaarulluinnartut
Trumpilli qullersaqarfianit, oqaluttuarisaanermut ilanngunnissaminik aalajangiusimannittumit, qeqertaq tatineqangaarpoq.
Ukiup aallartilaarnerani Venezuelap præsidentia Nicolas Maduro USA-p sakkutuuinit tigusarineqarmat, Trumpip Venezuelap Cubamut uuliamik assartuinera unitsippaa. Venezuela Cubap ilitut qaninnersaraa.
Nunanittaaq Cubamut uuliamik tuniniaasartunit nioqqutissat akitsuusersorneqarnissaat sioorasaarutigaa.
Cubami innaallagissiorfiit pisoqaareerlutillu aserfallatsaalineqarsimanngimmata nunap ilaani ullormut nalunaaquttap-akunneri 20-t angullugit innaallagiaaruttarneq nalinginnaavoq.
USA-lli uuliamik assartuiunnaarnerata nukissiuutitigut ajornartorsiut ajornerulersippaa, Cubamilu innuttaasut 11 millionit akornanni inuit millionillit innaallagiaarulluinnarput.
Cubamut uuliamik januaarip qulingiluaanili eqqussisoqarsinnaanngilaq, taamaattumillu timmisartortitseqatigiiffiit nunamut timmisartuussisarnerminnik killilersuipput. Tamanna Cubami takornariartitsinermut pingaaruteqarluinnartumut eqquivoq.
Ajalusooqqajaasoq
Cubap præsidentiata Miguel Diaz-Canelip Cubamilu atorfillit qaffasissumik inissisimaffillit arlallit toqqaannartumik tv-kkut ataatsimeeqatigiinnerat tallimanngornermi aallakaatinneqarpoq. Diaz-Canel Cuba USA-mik isumaqatiginninniartoq tassani oqarpoq, taakkuali marluk suut eqqartorneraat oqaatiginngilaa.
Trumpip pisortaqarfiani atorfillit præsidentip Miguel Diaz-Canelip tunuartinneqarnissaa pillugu Cubami suleqatitik tallimanngornermi qinnuigisimagaat, paasissutissanik pissarsisimasut sisamat aqqi ilisimaneqanngitsut The New York Times-imut ataasinngornerup unnuaani oqaluttuarput.
Trumpip Cubap ajalusooqqajaanera, nunallu USA isumaqatigiissuteqarfigiumagaa, sapaatit-akunnerini kingullerni oqaatigisaqattaarpaa.
Iranimi sorsunneq naammassippat Cuba isumaqatigiissuteqarfigineqarsinnaasoq sapaammi aamma oqaatigaa.
/ritzau/AFP
