Trumpip tusagassiortunik sapaatit akunnerata matuma siuliani katersortitsinermini aperineqarami oqaatigaa, coronavirusip Wuhannimeersuunera qularnaatsuusoq.Assi: Carlos Barria/Reuters/Ritzau Scanpix

Trumpip coronavirusip tuniluutilerfianik isumaliuutersuutaa WHO-p eqqoriaanertut nalileraa

Coronavirusip Kinami misissuisarfimmit tuniluutilersimaneranik USA-mit uppernarsaatissarsinngilagut. Nalagaaffiit Peqatigiit peqqissutsimut suleqatigiiffiat taama ilisimatitsivoq.

Coronavirusip Kinami Wuhannimi misissuisarfimmit tuniluutilersimaneranik uppernarsaatissaqartoq, USA-p præsidentiata Donald Trumpip oqaatigaa.

Uppernarsaatissanilli takusaqanngilavut. Naalagaaffiit Peqatigiit peqqissutsimut suleqatigiiffianneersoq (WHO) Michael Ryan taama oqarpoq.

- Nappaatip tuniluutilerfianik oqaaseqarneq isumaliutersuutaannaavoq. Paasissutissanik katersanik uppernarsaatinillu USA-mi naalakkersuisunit tigusaqanngilavut, Michael Ryan oqarpoq.

AAMMA ATUARUK Trumpip USA WHO-mut aningaasalersueqataajunnaarsikkaa

Trumpip tusagassiortunik sapaatit akunnerata matuma siuliani katersortitsinermini aperineqarami oqaatigaa, coronavirusip Wuhannimeersuunera qularnaatsuusoq.

Trumpip USA WHO-mut qaammatip siuliani tapiissuteqartittarunnaarsippaa, Naalagaaffiit Peqatigiit Kinamut maleruutiinnarnerarlugit tapiissutit unitsinneranut tunngavilersuutigaa.

Isummersuutit