USA-p præsidentiata Donald Trumpip coronavirusimik tunillanneqarnini Guutimit pilluaqqussutitut taavaa.

Trump videoliami Twitterikkut ippassaq pingasunngornermi saqqummersinneqartumi taama oqarpoq.

- Covid-19-imik tunillanneqarnera Guutimit tunissutaasoq isumaqarpunga. Pilluaqqussutaavoq, Trump, videoliami oqarpoq.

AAMMA ATUARUK Bidenip Donald Trumpip Covid-19 pillugu eqqissisaalluni oqaasii isornartorsiorai

Trump napparsimanermini katsorsaariaatsinik assigiinngitsunik misilittaavigineqarpoq, nakorsaatillu qanoq iluaqutaatigisinnaanerannut ilisimasaqarnerulertutut misigisimalluni. Katsorsaariaatsit misilissimasani USA-mi innuttaasunut akeqanngitsumik neqeroorutigineqarumaartut, Trumpip videoliami neriorsuutigaa.

- Uannut tunniunneqarsimasut tamassinnut tunniukkusuppakka. Akeqanngitsumillu neqeroorutigineqassapput, Trump ilaatigut oqarpoq.

Trump coronavirusimik nappaateqarnermut akunnerit 24-t kingulliit ingerlaneranni ersiuteqarsimanngitsoq, præsidentip nakorsaa Sean Conley oqarpoq.

Inuit præsidentimik qanimut suleqateqarsimasut maannamut 19-it coronavirusimik tunillanneqarsimasut paasineqareerpoq. Trumpip nappaammik tunillanneqarsimanini sapaatit-akunnerata siuliani tallimanngornermi nalunaarutigaa.