Trumpip Amy Coney Barrett eqqartuussiviit qullersaanni eqqartuussisussatut innersuukkaa

USA-p præsidentiata, Donald Trumpip, Amy Coney Barrett USA-mi eqqartuussiviit qullersaanni eqqartuussisussatut innersuuppaa.

Præsidenti illorsuarmini arfininngormat unnukkut tusagassiortunut katersortitsinermini taama oqarpoq.

- Nuanneqaaq, atorfimmut tassunga tulluarluinnarputit, Trump tusagassiortunik katersortitsinermi oqarpoq.

Amy Coney Barettip innersuunneqarnera isumaqarpoq USA-mi eqqartuussiviit qullersaanni eqqartuussisut arfiniliusut tamarmik konservativeninngaanneersuunerat.

Trumpip toqqaanera politikkikkut avissaartuuffiuvoq. Præsidentimi isumaqarpoq, amerikami præsidentinngorniuulluni qinersinissaq novembarip ulluisa pingajuanni pisussaq eqqartuussiviit qullersaanni naammassineqassasoq.

Taamaattumik eqqartuussiviit qullersaanni eqqartuussisut qulingiluat toqqarneqarnerat pingaaruteqartuusoq taanna isumaqarpoq.

AAMMA ATUARUK Biden: Qinersisartut eqqartuussiviit qullersaanni eqqartuussisumik nutaamik toqqaannginnermi tusaaniarneqartariaqarput

Demokratilli allatut isumaqarput, taakkua præsidentimut qinersisoqareerpat aatsaat eqqartuussiviit qullersaanni eqqartuussisumik nassaartoqassasoq, tamannali Trumpip akuerinngilaa.

Trumpip toqqagaa Amy Coney Barrett Senatemit maanna misissorneqassaaq.

Senatip inatsiseqarnermut ataatsimiititaliaanit tamatuma kingorna immaqa ullualunni tusarniarneqassaaq.

Innersuussineq Senatimut taasissutigineqartussatut ingerlateqqinneqassanersoq ataatsimiititaliamit tamatuma kingorna taasissutigineqassaaq. Tassanilu amerlanerussuteqartut Senatemitullu aalajangiisuussapput.

Innersuussinerup akuerineqarnissaa ilimanarpoq, Senatemi republikanerit amerlanerussuteqamarta 53-iullutik, demokraatit 47-sut.