USA-mi præsidentimut sapaatit-akunneri sisamat qaangiuppata qinersisoqartussaavoq. Præsidentilu Donald Trump partiialu republikanerit qinersinermi ajorsassasut, inunnik isumasiuinerit takutippaat.

Demokratit præsidentimut qinigassanngortitaat Joe Biden demokratillu ataatsimut isigalugit qinersinermi ajugaasuussasut, isumasiuinerit aamma takutippaat.

Sapaatit-akunnerata kingulliup ingerlanerani pisut marluk, inuit isumasiorneqartut akissutaanni takuneqarsinnaassagunarput.

Tassa Trumpip Bidenillu tv-kkut oqallitsinneqarnerat oqqaffiungaatsiartoq, Donald Trumpillu coronavirusimik tunillatsissimanerminik ullut pingasut qaangiummata nalunaarutaa.

AAMMA ATUARUK Facebookip USA-mi præsidentimut qinersinissamut allagarsiussat salloqittaatit inerteqqutigigai

Inunnilli isumasiuinerit Donald Trumpip putusaarinertut taavai.

- Nutaarsiassaqartitsivittut imminut taagortut inunnik isumasiuinertut taallugit saqqummiussaat putusaarutaapput, Donald Trump napparsimmavimmit Walter Reed Medical Centerimit angerlaqqammerluni Twitterikkut taama ilaatigut allappoq.

Nutaarsiassaqartitsiviup CNN-ip inunnik isumasiuinera naapertorlugu apersorneqartut 63 procentii isumaqarput, Trumpip nammineq coronavirusimik nappaateqarnermi nalaani akisussaanngitsuliorsimasoq. 33 procentii isumaqarput, Trump akisussaassuseqartumik pissusilersorsimasoq.

Inunnik isumasiuinerit ataatsimut isigigaanni, Biden agguaqatigiissillugit 8,5 procentpoitinik siuaqqavoq.

Inunnik isumasiuinerit inunnik isumasiuinerupput, allaavorli qinersisartut novembarip ulluisa pingajuanni qanoq qinersiumaarnersut.