Trump Kim Jong-unilu ataatsimiinnerat iluatsilluarpoq
Isumaqatigiissutilli immikkuualuttortai tamanut suli saqqummiunneqanngillat.
USA-p præsidentia Donald Trump, Korea Avannarliullu siuttua Kim Jong-un, oqaluttuarisaanermi pingaarutilimmik Singaporemi unnuaq naapipput:
- Isumaqatigiissut pingaaruteqartorujussuaq atsioqatigiissutigivarput. Oqaloqatigiilluarpugut, ikinngutigiillualerpugullu, Donald Trump oqarpoq, isumaqatigiissutillu immikkuualuttortaasa tusagassiortunik katersuutsitsinermi saqqummiunneqarumaarnerat neriorsuutigalugu.
- Isumaqatigiissusiorsinnaanerput tulluusimaarutigeqaarput, oqarpoq.
Isumaqatigiissut oqaluttuarisaanermut pingaarutilik atsiorneqartoq, Korea Avannarliup siuttuata Kim Jong-unip oqaatigaa, siornatigullu pisimasut puigorlugit siumut isiginiartoqartoq oqaatigalugu:
- Allanngorujussuartoqarnera nunarsuarmioqatigiit takujumaarpaat, Kim Jong-un, nutserisuni aqqutigalugu oqarpoq, præsident Trumpilu qujassuteqarfigalugu.
USA-p præsidentiata tusagassiortunit apersorneqarnermini ilaatigut oqaatigaa Kim Jong-ip Washingtonimut tikeraartinneqarnissaanut piareersimalluinnarluni.
Trumpip Kim Jong-un silassorissutut taavaa, ataqqinarpaluttumillu, ilaatigullu sakkortusinnaasumik isumaqatiginninniartartuunerarlugu.