Trump: Iranip siuttua toqqorluni uumavoq - ajoquseqqavorli
USA-p præsidentiata Donald Trumpip Iranip siuttua, Mojtaba Khamenei, suli uumassangatippaa ajoquserneqarsimassangatilluguli.
Nutaarsiassaqartitsivik Reutersip nutaarsiassiinera naapertorlugu, Trump Fox Newsimit apersorneqarami, taama oqarpoq.
Iranimi atorfilik kinaassusersineqanngitsoq, sapaatip-akunnerani matumani siusinnerusukkut oqarpoq, 56-inik ukiulik Mojtaba Khamenei saassunneqarnermini ikiligaalaarsimagaluarluni sulinini ingerlatiinnassagaa.
- Suli uumannguatsiarpoq. Ajoqusersimagunarporli, kisianni suli uumagunarpoq, Trump apersorneqarnermini oqarpoq.
Reutersip nutaarsiassiinera naapertorlugu, Iranimi præsidenti, Mojetaba Khamenei, sapaatiummat præsidentinngortinneqaramili pisortatigoortumik suli saqqummeqqinngilaq.
Iranimili siuttunngorlaaq Iranimi tv-kkut aallakaatitsisumit sisamanngornermi atuarneqartumik oqaaseqaateqarpoq.
Mojtaba Khameneip USA-p Kangiani Qiterlermi sakkutooqarfini ingerlaannaq matussagai oqaaseqaatimini kajumissaarutigaa. Aammattaaq sakkutooqarfiit Iranimit saassunneqarnissaannik aarlerisaarivoq.
Kinguneqarujussuartoq
Donald Trumpip ayatollah Ali Khamenei sapaatit-akunneri marluinnaat matuma siorna saassussinermi toqutaanerata kingorna Iranimut siuttussarsiornermi aalajangeeqataarusunnini siusinnerusukkut oqaatigaa.
Trump tamatumunnga atatillugu oqarpoq ayatollahp ernerata, Mojtaba Khameneip, siuttussatut toqqagaanera akuerisinnaanagu.
USA-p Israelillu Iranimut saassussinertik februaarip 28-anni aallartippaat. Trumpip Iranip atomimik sakkussiaqalernissaa missilinillu USA-mut anngussinnaasunik sakkussiornissaat taamani pinaveersaartinniarnerarpaa.
Iranip Israel Amerikallu Kangiani Qiterlermi sakkutooqarfii arlallit akiniaanermini saassuppai.
Sorsunneq sapaatit-akunneri marluinnaat kingulliit ingerlaneranni nunarsuarmi timmisartuussinernut uuliamillu pilersuinermut sunniuteqaqaaq.
Nunarsuarmi uuliap 20 procentia missaa Hormuzip kangerliumarngani, Iranip Omanillu akornanniittumi, Iranip sineriaatigut assartorneqartarpoq.
Iranimi mumisitsisut sakkutuuisa Hormuzip kangerliumarnga tiguarsimanerarmassuk umiarsuit angallakkunnaapajaarput.
Taamaakkaluartorli umiarsuit Hormusip kangerliumarngatiguuginnartarnissaat Donald Trumpip Fox Newsimit apersorneqarnermini kajumissaarutigaa.
Præsidentip Iranip illersornissaqarfia amerikamiut saassussereerneranni umiarsuaataarussimanerarpaa.
- Ersinartoqanngilaq. Umiarsuaateqanngillat, umiarsuaatai tamaasa kivisereerpagut, Donald Trump oqarpoq.
/ritzau/
