Trump: Iran USA-mik ataatsimeeqateqarusuppoq
Nunat taakku marluk, Iranip atomip nukinganik atuiniarnera pillugu ukiuni kingullerni aaqqiagiissuteqartarsimasut, Naalagaaffiit Peqatigiit New Yorkimi qaammatip massuma ingerlanerani ataatsimeersuarnissaanni naapinniarnerannut eqqoriaanerit taamaasillutik piviusunngulerunarput.
- Iranimiut naapinniaraatigut oqaluttuarisinnaavara. Trump, tusagassiortunut, præsidentip Washingtonimi illorsuata saavani katersuussimasunut oqarpoq.
Iranip præsidentianik Hassan Rouhanimik ataatsimeeqateqarniarnini, Trumpip arlaleriarluni oqaatigisarsimavaa. Rouhanip Naalagaaffiit Peqatigiit New Yorkimi ataatsimeersuarnissaannut peqataanissaa naatsorsuutigineqarpoq.
Iranimiulli ataatsimiittoqarsinnaanissaanut ammanertik maannamut nalunaarutigisarsimanngilaat.
Rouhanip Trumpip aqutseriaasia ippassaani pingasunngornermi isornartorsiungaatsiarpaa, USA-p akeqqersimaarnerata sioorasaarineratalu nunamut taassumunnga iluaqutaannginnera oqaatigalugu.
Iranip atomip nukinganik atuisinnnaanissaa pillugu 2015-imi isumaqatigiissusiortoqarpoq, nunat assigiinngitsut tassani atsioqataallutik, USA taakkununnga ilaalluni. USA-li isumaqatigiissummit taassumannga siorna anivoq, USA-llu Iranillu akornanni kingorna ajorsiartuinnavillutik.
Atomimik atuisinnaanissaq pillugu isumaqatigiissut, nunat Naalagaaffiit Peqatigiit Isumannaallisaaniaqatigiivini ataavartumik ilaasortaannit USA-mit, Ruslandimit, Kinamit, Tuluit Nunaannit Frankrigimiillu, saniatigullu Tysklandimit atsioqatigiissutigineqarpoq.
Iranip atomip nukinganik atuinerata ilaa atorunnaarsinneqassasoq ilaatigut isumaqatigiissutigineqarpoq. Nunat assigiinngitsut aningaasarsiornikkut immikkut sukannersumillu Iranimut iliuuserisaat annikilliartortinneqarnissaat paarlattuanik isumaqatigiissutaavoq.
Trumpilli USA isumaqatigiissummit ilaajunnaarsimaguli Iranimut iliuutsit ilaatigut sakkortusineqarsimapput.
Iranip akerlianik isumaqatigiissummit aninissani arlaleriarluni sioorasaarutigaa.