USA-p præsidentia, Donald Trump, USA-llu nunanut allanut tunngasunut ministeria, Mike Pompeo, Dronningimut Danmarkillu Kunngeqarfiata inuinut tamanut inuulluaqqussuteqarput.Assi: Scanpix

Trump Dronningimut: Sinniisoqalernikkut Kalaallit Nunaannut attaveqarnerulissaagut

USA Nuummi sinniisoqarfeqalerpat USA Kalaallit Nunaallu attaveqaqatigiinnerulerumaartut, Donald Trump Dronning Margrethemut Inatsisitaarfimmi inuulluaqqussummini allappoq.

Donald Trump USA-mi eqqissiviilliortoqaraluartoq Danmarkimi Inatsisitaarfiup juunip ulluisa tallimaanni ullorititaanik maluginiaanissaminut piffissaqarsimavoq.

Donald Trump Dronning Margrethemut tamatumunnga atatillugu inuulluaqqussuteqarpoq, taannalu USA-p Københavnimi aallartitaqarfiata nittartagaani atuarneqarsinnaavoq.

Inatsisitaarfiup malunnartinneqarnerani pilluaqqusillunilu USA-p Danmarkillu assigiinnik naleqartitaqarnikkut attaveqaqatigiilluartut, præsidentip erseqqissarpaa.

AAMMA ATUARUK Amerikamiut sinniisoqarfissaat Issittumi Sakkutooqarfimmiissasoq

Tamanna inuiaqatigiit akornanni niueqatigiinnermilu atuuttoq, Trump aamma allappoq.

USA Kalaallit Nunaallu attaveqaqatigiilluartut, aamma USA Nuummi sapaatit akunnerata tulliani sinniisoqarfeqalerpat attaveqaqatigiinneruleriaannarumaartut ilanngullugu eqqaasitsissutigaa. 

Kalaallit Nunaanni sinniisoqarfeqaleqqinnissatsinnut erinisuppugut, ilimagalutigullu Danmarkip Kunngeqarfianik attaveqaqateqarluarnerput patajaannerulissasoq, præsident Trump inuulluaqqussummini allappoq.

USA-p nunanut allanut tunngasunut ministeria, Mike Pompeo, Danmarkip Kunngeqarfiata inuinut tamanut aamma inuulluaqqussuteqarpoq, taannalu USA-p Københavnimi aallartitaqarfiata nittartagaani aamma atuarneqarsinnaavoq.

AAMMA ATUARUK Professori: USA-p millionilikkaanik aningaasaliinera kusanaatsuliornikuuneranik puigorsaataavoq

Nuummilu sinniisoqarfittaassaq USA-p Issittumi inissisimaneranut pingaaruteqartoq, taassuma aamma erseqqissaatigaa.

- Ukiut 67-it qaangiuteriillartullu Kalaallit Nunaanni ukioq manna sinniisoqarfeqaleqqinnissatsinnut erinisuppugut, Kalaallit Nunaannillu attaveqaqateqarneruleriaannarnissarput ilimagalutigu. Issittumi ilisimatusarnermut, avatangiisinik mianerinninnermut atajuartussamillu ineriartortitsinermut tapersiilluta Issittumi Siunnersuisoqatigiinni suleqataanerput tulluusimaarutigaarput, Mike Pompeo allappoq.

USA-p nunatsinnut 83 millionit koruuninik aningaasaliinissaanut, Naalakkersuisut apriilimi akuersipput, aningaasaliissutiginiagaalu nunatsinni ilaatigut aatsitassarsiornermut takornariartitsinermullu siunnersuinermut atorneqassapput.

Tamanna paaseqatigiinnissamik isumaqatigiissuteqarnikkut pivoq, taannalu USA-p nunattalu 2019-imi juunip qaammataani atsiorpaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat