Trump Demokraatinik ataatsimeeqateqarnerminit aniinnartoq

USA-p Mexicomut killerfiata nalaani qarmarsualiortoqarnissaanut milliardilikkaanik aningaasaliinnginniarnertik, USA-mi inatsisartuni demokratit siuttuisa Nancy Pelosip Chuck Schumerillu aalajangiusimareeraallu, USA-p præsidentiata Donald Trumpip isumaqatiginniniarnerit ippassaq unukkut qimaannarpai.

Aviisip The New York Timesip allaaserisaa naapertorlugu Trumpip nerrivik patipilooriarlugu præsidentip illorsuata Det Hvide Husip ilaani ataatsimiittarfik qimaannarpaa.

AAMMA ATUARUK Trumpip killeqarfimmi qarmarsualioqqusinini aalajangiusimaannarpaa

- Asuli piffissaajaataaneruvoq, Trump, Twitterikkut kinguninngua taama allappoq.

USA-mi pisortat suliffeqarfiutaanni sulisut 800.000-it missingersuutit pillugit aaqqiagiinngissuteqartoqarnerani suliartorsinnaanngillat, akissarsiaqanngilallu, innuttaasullu sullinneqarnerat aamma eqqorneqarluni.

USA-p Mexicollu akornanni killeqarfimmi qarmarsualiornissamut 37 milliardit koruuninik USA-mi missingersuutitigut aningaasalersorneqarsinnaanngippat, soorlu Donald Trumpip tamanna piumasarigaa, pisortat suliffeqarfiutaasa ilaat aningaasalersorneqarsinnaanngillat sulisullu angerlartiinnarneqartariaqarlutik.