Trump Danmarkiliaratarsinnaanerarpoq
USA'p præsidentia, Donald Trump præsidentip illuarsuani tusagassiortunut ippassaq oqarpoq, Europamut septembarip aallartinnerani angalanissamut atatillugu Danmarkiliaratarsinnaalluni.
Nutaarsiassaqartitsivik Reuters taama allaaserisaqarpoq.
Trump nassuiaavoq nazistit Polenimut ukiut 80-t matuma siorna saassussinerat eqqaaniarlugu septembarip aallaqqaataani Polenimiissalluni.
Polenimiut atorfillit Trumpip tikeraarnissaanut pilersaaruteqartoqartoq qaammammi maani siusinnerusukkut oqaatigaat.
- Qilanaaraara. Inuit nuannaraakka, Amerikamiut præsidentiat oqarpoq.
Imaassinnaavoq tamatumunnga atatillugu Danmarkiliartunga, Reuters naapertorlugu nangippoq.
Trumpip præsidentitut siulii pingasut Bill Clinton, George W. Bush aamma Barack Obama præsidentiutillutik Danmark tikeraarpaat.
Præsidentillu Danmarkiliarnissaa suli uppernarsineqanngitsoq Statsministereqarfik ilisimatitsivoq. Præsidentip Danmarkiliartinneqarnissaanik sulissutiginnittoqarneranik ministereqarfik uppernarsaajumanngilaq.
- Amerikamiut præsidentiata Danmarkimut tikeraarnissaa massakkut uppernarsineqarsimanngilaq.
- Præsidenti Danmarkimut qanilaartuuvoq taamaattumik tikilluaqquneqartuaannassaaq, Statsministereqarfik allakkatigut taama akissuteqarpoq.
Ministeriuneq Mette Frederiksen (S) Trumpip nalunaarneranut marlunngornermi unnukkut oqaaseqartinneqarsinnaasimanngitsoq ministereqarfik paasissutissiivoq.
