Macron G7-imi ilaasortanut: Trump avaqqullugu isumaqatigiissusiornissaq tunuarsimaarfigisariaqanngilarsi

Nunat suliffissuaqarfiusut annerit arfineq-marluk G-7-imik aamma taaneqartartut, naalakkersuinikkut siuttui, Canadap illoqarfiisa pingaarnersaanni Ottawami ullumimit ataatsimiilissapput, USA-llu præsidentiata Donald Trumpip piffissami kingullermi aalajangersimasami kingunerisaanik immikkoortitaasutut misigisimanissani naatsorsuutigisinnaavaa.
Frankrigip præsidentia Emmanuel Macron Assi © : Flickr.com / Mutualité Française
Allattoq Ritzau
juunip 08-at 2018 07:04
Nutserisoq Mads Lynge

- Trump avaqqullugu isumaqatigiissusiorsinnaanissamut nunat G-7-imiittut allat tunuarsimaarfigisariaqanngilaat, naak tamarmiulluni isumaqatigiinneq soorunami pitsaanerpaagaluartoq, Frankrigip præsidentia Emmanuel Macron, nunat G7-imi ilaasortat akornanni ilaasortat Europameersut siuttuisa ataatsimiinneranni oqarpoq. Nunat Europameersut G-7-imi ataatsimiinnermi isumaqatigiinniutissatik ataqatigiissinneqarnissaat pillugu ataatsimeeqatigiipput.

- Immikkoortoqassaaq USA-p præsidentiata immaqa isumaqatigivallaarunanngisaanik. Silap pissusiata allanngoriartornerata akiorniarneqarnissaanut tunngasut taakkununnga ilaapput, niueqatigiinnermullu tunngasut aamma, Macron oqarpoq.

- Europamiuusugut Japanimiuusugullu Trumpip atsioqataanissaa piinnarlugu suna tamaat tunniutiinnarfigerusunngilarput. Tamanna kukkunerussaaq, Macron oqarpoq, pisariaqassappallu isumaqatigiissusiortut arfiniliinnaasinnaanissaat ajoriffissaqartinnagu.

USA-p sisammut alumiiniumullu nunanit assigiinngitsuneersunit juunip aallaqqaataanit atuutilersumik akitsuusiinera, Canadap Japanillu Ottawami ataatsimiinnissap siuliani akerliuffigisorujussuuaat.

/ritzau/