True North Gems isumalluartoq

Taamaattorli suliffeqarfiup pisortaa isumalluartorujussuuvoq. Tassami rubinit aamma ujaqqat erlinnartut tungujortut safirit nunatsinneersut pitsaalluinnartuummata naammattumillu pigineqarlutik aamma nunarsuatsinni allani pisartutut pinerlunniarnermi iluanaarniutitut atorneqannginnerat ileqqorissaarnertut oqaatigineqarpoq.

Tassami nunarsuatsinni rubininik niuerneq naalakkersuinikkut eqqissiviilliortunit, naqisimanninniartunit sorsunnernillu sunnerneqarsimaqimmat. Soorlu tamanna Afghanistanimi, Afrikap Kangiani Burmamilu ilisimaneqartoq.

Taamaattumik rubinit nunatsinneersut pitsassuartut pinerliinianillu sunnersimaneqanngitsutut isiginiarneqassapput.

Rubinit True North Gems-ip manna tikillugu nassaarisai 6 miliuunit koruuninik naleqartutut nalilerneqarallarput. Missueqqissaarnermut 20 miliuunit koruunit atornissaat suliffeqarfiup naatsorsuutigaa.