Aqquserngit qimuttuitsullu aqqutaat suli assersorneqarput.Assi: @unistotencamp, Twitter

Trudeau assersuisoqarunnaarnissaanik piumasaqaraluartoq suli akerliusoqartoq

Canadami gassip aqqutissaanik sanaartortoqarnissaa akerliuffigalugu aqqutinik sapaatit akunneri marluk assersuisoqarpoq, pissutsillu pitsanngoriartoratik.

Indianerit nunaannit, Canadami naalagaaffimmi British Columbiamiittumi manerassuup tungaanut ruujorimik gassip aqqutissanik sanaartortoqarnissaa akerlerineqarmat, akerliussutsimik takutitsinerit aallartipput.

British Columbiap avataani nunaannarmi sanaartorfiusussami indianerit Wet’Suwet’imi høvdingii ataatsimoorlutik najukkaminni sapaatit akunnerini kingullerni marlunni siullermik assersuipput, pissutsillu najummassinartorsiorfiullutik.

Akerliusut ilaat politiinit tigusarineqarmata, indianerit naggueqatigiit assigiinngitsut, canadamiut naggueqatigiillu inuit akerliunermut tapersersuillutik ilanngupput.

Aqquserngit qimuttuitsullu aqqutaat assersorneqarput - canadamiullu tusindilikkut suliartorsinnaanngillat, pisinniarfinnilu nioqqutissat amigaatigineqalereerlutik.

Ministeriunerup Trudeaup tallimanngornermi tusagassiortunik katersortsitsinermini CBC Newsimut oqaatigaa, akerliuneq nunap aningaasaqarneranut sunniuteqalermat unitsinneqartariaqartoq.

Indianerit høvdingii akillutik oqaatigaat, indianerit nunap inoqqaavilu allat ukiuni hundredilikkuutaani aningaasaqarnikkut atugarliortooreersut.

Avissaartuunneq sakkortusisinnaasoq
Naalakkersuisut nunap inoqqaavilu akunnerminni oqaloqatigeeriaraluartarnerpassui pillugit Makivik-mi præsidentip, Charlie Wattip nersualaarutigaa.

Erseqqissaatigaali nunap inoqqaavi naapertuilluanngitsuliorfigineqarlutik atugarliuutaat iliuuseqarfiginagit - akerliusut unitsinniarlugit politiit arlaatigulluunniit pissaaneq atorlugu unitsitsisoqassappat, tamanna saammaasseqatigiinnissamut avissaartuussutaalersinnaasoq.

Aviisip Inuvik Drumip allaaserisaani pingaarnermi allaaserineqarpoq, nunasiaateqarsimasut piumasartik pinngikkunikku aallaasit atulissagaat qangalu oqallorissaarutit atorneqalissasut.

- Saammaasseqatigiinnissaq kissaatigineqarluinnarpat, taava pissutsit nunarsuarmi tamani nunap inoqqaavisa atugaat allanngortinneqartariaqarput massakkullu piffissaalluni.

Nunap inoqqaavi utaqqikatapput, aaqqissuisoq, Eric Bowling taama allaaserisaqarpoq.

Ministeriunerup Trudeaup qimuttuitsut ataasinngornermit ingerlaaqqilernissaat kissaatigaa, tamannali iluatsissanersoq suli qularnarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat