Troels Lundip Danmarkimut ataqqinninnissaq USA-p aallartitartaavanut oqaluuserigaa

Illersornissamut ministeri Troels Lund Poulsen (V) USA-p aallartitaanik Ken Howerymik marlunngornermi ataatsimeeqateqarluni oqarpoq, Danmarkip kunngeqarfiata ataqqineqarnissaa naatsorsuutigalugu.

Illersornissamut ministeriaqarfik X-imi taama allappoq.

Howery USA-p Danmarkimi aallartitaartaavatut sapaatip-akunnera kingullermi atorfinitsinneqarpoq.

Ministerilu marlunngormat ataatsimeeqatigaa.

- USA Danmarkillu iligiinnerannik oqariartuut oqaatigeqqippara aamma soorunami naatsorsuutigaara Kunngeqarfik Danmark ataqqineqassasoq.

Ministeriaqarfik naapertorlugu, præsidentip Donald Trumpip nunarput pillugu oqaasii pissutigalugit qaammatini aqqanilinni kingullerni "ajornartorsiuteqartoqarsimasoq“, taassumap erseqqissarpaa.

Iligiit imminnut qanittut

Trump arlaleriarluni oqarnikuvoq Kalaallit Nunaat aqukkusullugu. Sakkutuulersorlunilu tamanna anguniarnissaa naaggaanngilaa, nunatsinnilli aqutsilernissamik pisariaqartitsinini kingullertigut pisortatigoortumik oqaatigineq ajorpaa.

Illersornissamut ministeriaqarfik naapertorlugu ataatsimiinnermi oqariartuutigineqartut pingaarnerit tassaapput "Danmark USA-lu iligiipput, Danmarkillu ataatsimut isumannaatsuunissamut akisussaaffik nammineq tiguaa“.

Troels Lund Poulsen naapertorlugu nunarput kisiat ataatsimiinnermi oqaluuserineqanngilaq. Sammisat allat aamma oqaluuserineqarput.

USA-p Danmarkillu akornanni "illersornissaq pillugu qanimut suleqatigiilluarneq“, "Ukrainemut tapersersuinerup ingerlateqqinnissaata pingaaruteqassusia“ aamma „Amerikamiut illersornissamut atortussanik tunisassiortarfiata piffissaq sivisooq atorlugu pilersuisarnerata unammillernartuunera“ oqalusserineqarput. Ministerip X-imi allaaserisamini tamanna oqaatigaa, taakkua marluullutik qungujulasut assitaliullugu.

Howery X-imi aamma allaaserinnippoq.

- USA-p kunngeqarfiullu Danmarkip suleqatigiinnerat ukiuni qulikkuutaani ingerlasimasoq qanoq iliornikkut nukittorsarneqarsinnaanersoq, ataatsimullu isumannaatsuunissarput illersornissaqarfippullu tapersersorumallugit, illersornissamut ministeri Troels Lund Poulsen,  oqaloqatiginiarlugu ullumi naapinnera nuanneqaaq, taanna allappoq - assiliseqatigiissimanertik aamma assitaliullugu.

/ritzau/