Troels Lund Poulsenip Natomi siuttut ataatsimeeqatigissagai: Nato Issittumi iliuuseqarnerusariaqartoq
Illersornissamut isumaqatigiissuteqartoq Nato Issittumi iliuuseqarnerusariaqarpoq.
Illersornissamut ministeri Troels Lund Poulsen (V), Bruxellesimi Natop generalsekretærianik Mark Ruttemik Kalaallit Nunaanni Issittumilu pissutsit eqqartorniarlugit ataasinngornermi ataatsimeeqatiginnittussaq, taama oqarpoq.
Nunanut allanut tunngasunut ministeri Vivian Motzfeldt aamma ataatsimiinnermut peqataassaaq.
- Danskit kalaallillu naalakkersuisuisa Natomi suleqatigisatik arlallit peqatigalugit Issittumi Atlantikullu avannaani sakkutooqarnerulernissaa sungiusartoqarnerunissaalu aalajangerpaat.
- Iligiit arlallit ikiuereerput, Nato-llu Issittumi iliuuseqarnerunissaanik tapersersuineq angisuujuvoq. Tamanna Vivian Motzfeldtilu Natop generalsekretærianut Mark Ruttemut oqaluuserissavarput. Nunani avannarlernittaaq illersornissamut ministerinik ataatsimeeqateqarnissanni ullumi kingusinnerusukkut pisussami tamanna qitiusumik oqaluuserisassaassaaq, illersornissamut ministeri Troels Lund Poulsen oqarpoq.
Danmark uparuartorneqaqqittoq
USA-p præsidentiata Kalaallit Nunaat pigilerusullugu oqareernerata kingorna ataatsimiinneq pilersaarutaalerpoq.
- Kalaallit Nunaat immikkut ittumik inissisimaffeqarluni nunarsuarmit tamarmit maluginiarneqarpoq. Tamannalu pissutigalugu Natomi Issittumi illersornissaq isumannaallisaanerlu pillugit suleqatigiinnerup nukittorsarneqarnissaa pisariaqarpoq, Motzfeldt oqarpoq.
Danmarkip Kalaallit Nunaannut iliuuserisimasai Trumpip ataasinngornermi ullaakkut isornartorsioqqippai.
Ruslandip Kalaallit Nunaannut ulorianartorsiortitsiunnaarnissaa Nato Danmarkimut ukiuni 20-nipiumaffiginnittarpoq, Trump inoqatinut attaveqaqatigiittarfimmini Truth Social-imi allappoq.
- Danmarkip tamanna ajoraluartumik iliuuseqarfigisinnaasimanngilaa. Maanna piffissanngorpoq, iliuuseqartoqarumaarporlu, Trump allappoq.
Qanoq ulorianartorsiortitsiunnaartoqarnissaanik præsidenti itinerusumik oqaaseqanngilaq.
Akitsuusersuinikkut pillaaneq
Kalaallit Nunaannullu tunngatillugu pissutsit pissutigalugit nioqqutissat Danmarkimeersut Europamilu nunanit arfineq-marlunnit allaneersut 10 procentimik februaarip aallaqqaataanit akitsuuserneqassasut, arfininngornermi Trump nalunaarpoq.
Nunat taakkua Kalaallit Nunaannik tiguaanissamut akuersinngippata akitsuutit 25 procentinik juunip aallaqqaataanit ilaneqassapput.
Nunat taakku arfineq-marluk allat - tassa Norge, Sverige, Frankrig, Tyskland, Tuluit Nunaat, Holland Finlandilu - Danmark kalaallillu inuiaqatigiit tapersersorluinnarlugit sapaammi ataatsimut nalunaaruteqarput.
Aamma EU Danmarkimik Kalaallit Nunaannillu tapersersuinerminik suaaruteqarpoq.
/Ritzau/
