Troels Kløvedal Tulukkamut ilaalluni aallakaatitassiornialerpoq

Umiarsuaaraq alapernaarsuut Tulugaq Narsarsuarmiit juulip 14-iani aallarpoq, avannamukaarniartussaalluni. Angalaarneq iluatsilluassappat Tartupaluk tikinneqartussaassaaq.
Allattoq Mads Lynge
juulip 25-at 2008 07:45

Seqernup pulanera aggustip aallaqqaataani matumani aamma naatsumik aallakaatitassiariniarneqarpoq, Tulukkalli angalatinneqarnera allamik siunertaqarpoq, tassa sakkutuut imarsiortut oqaluttuarisaaneranut atatillugu angalasoqassammat.

Sakkutuut imarsiortut aappaaguagu 2010-mi ukiut 500-nngortorsiorlutik nalliuttorsiussapput, sakkutuullu imarsiortut oqaluttuarisaanerat aallakaatitassianngorlugu suliarineqartussaammat, danskeq angalatooq imarsiortoq Troels Kløvedal Tulukkamut angalaqataassaaq, ilaquttani ilagalugit Kalaallit Nunaata avannaarsuanukassagamik.

Sakkutuut imarsiortut ilisimatuullu ukiun kingullerni annertunerujartuinnartumik suleqatigiittarnerat Tulukkap angalaarnerani ersersinniarneqarpoq, Atlantikkullu avannaani suliassat suusinnaasarnersut aamma oqaluttuariniarneqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq