Trikine pillugu inatsit nutarterneqartariaqalersoq
Nerisat aqqutigalugit trikinimik nappaateqalerneq pinngitsoortinniarlugu inatsit nutarterneqartariaqalersoq, biologitut ilisimatuunngorlaap Lone Nukaaraq Møllerip ilisimatuunngorniummini tikkuarpaa.
- Ilisimatuutut allaatigisaqarninni paasivara nappaat trichinellose siornatigornit annikinnerusumik atugaagaluartumik suli Kalaallit Nunaanni ullumikkut atuuttoq.
1940-kkunni 50-ikkunnilu nappaammik tamatuminnga eqqugaasut amerlasoorparujussuusarput, sulili ullumikkut nalaanneqartarpoq kingullermillu 2001-imi tamanna annikitsumik naammattoorneqarluni, taama oqarpoq, taama oqarpoq biologitut ilisimatuunngorlaaq Lone Nukaaraq Møller.
Taanna aamma erseqqissaavoq paasisimagini puisit aamma trikinip bakteeriaanik tunillanneqarsinnaasartut, taakkuli nannuniit aarriniillu tunillanneqarsinnaassusaat annikinneerarsuusoq.
Taamatuttaaq trikinip bakteeriaa siammasissinnaanerarpaa puisit sumiluunniit pisaasinnaasarnerat peqqutigalugu, taamaattorli nanoqarfiusuni aaveqarfiusunilu tassalu avannaani tunumilu takussaanerusartoq erseqqissaatigaa.
Lone Nukaaraq Møllerip ilisimatuunngorniutini oqallissaarutitut atorsinnaanerarpaa.
- Inatsit massakkut atuuttoq ullumikkumut naleqqukkunnaarsimavoq taamaattumik ilisimatuunngorniutiga tamatumunnga oqallititsiniutaasinnaavoq inatsimmut apeqqusiitillugu inatsit taanna ilumut atorsinnaanersoq.
- Uanga isinnit isigalugu inatsit nunatsinni atorneqartoq massakkut misissuinermi periusereqqusanut naleqqutinngilaq, Lone Nukaaraq Møller oqarpoq.
Taassuma inatsimmi allassimasoq assersuutigaa, neqi misissorneqareerluni paasineqarpat neqi immannguaq trikinimik akoqartoq taava nerigaluaraanni ajornavianngitsumik imalimmik inatsit allassimammat.
- Inatsimmi ilaatigut allassimavortaaq neqi trikinimik akulik uulluarluguluunniit qeritikkaanni taava ajornavianngitsoq. Unali erseqqissaatigineqartariaqarpoq taanna inatsit europaannarmi nunaniluunniit allani trikinimik naassaarfiusinnaasuni taamaallaat atorsinnaammat, Nunanili issittuni atorsinnaanani pissutigalugu bakteeria taanna issittumi uumalluarsinnaasuummat, taamaattumik inatsit taanna ullutsinnut naleqqukkunnaarsimavoq oqallisigineqartariaqalerlunilu, Lone Nukaaraq Møller oqarpoq.
Taassuma aamma innersuussutigaa Canadami inatsisitigut periuseq qimerloorneqarsinnaanera taakku allaanerusumik periuseqarlutik tamanna pinaveersimatimmassuk. Nunavumi aalajangersimasumik periuseqartarput aavermik pisaqartoqarsimappat Laboratoriami neqi misissoqqissaarneqaqqaartarpoq akunnerillu 24-t qaangiukkaangata neqi aatsaat akuerineqarsinnaappat akuerineqarsinnaalertarluni, Lone Nukaaraq Møller oqarpoq.
