Triatlonerlutit nukitit arfininngorpat misilikkit

Qeqertarmiut unammiuaarneranni Bermudami aasaru juulimi pisussami, triathlonimi, tassa timersuutinik pingasunik unamminermi, nalunnermi, arpannermi sikkilernermilu Nunarput siullermeerluni peqataasussanngorpoq.
Allattoq Elisa Isaksen
juunip 18-at 2013 06:37

Timersuut taanna ilisimaneqarnerulersinniarlugu kalaallit timersuummik taassuminnga ingerlatallit unammiuaarniarput. Tassa peqataasut unammissutigissallugit siullermik nalunneq, taava sikkilerneq naggataatigullu arpanneq. Tamatuma saniatigut meeqqat timersuutinik marlunnik unammisinneqassapput, tamatumani sikkilerneq arpannerlu unammissutigineqassallutik.

Unammiuaarnerit Nuummi naluttarfimmi Malimmi eqqaanilu juunip ulluisa 22-anni nalunaaqutaq quliniit pissapput.

Takissutsit assigiinngitsut pingasut peqataaffigineqarsinnaapput:

Sungiussilluarnerusimasunut OL Triathlon-imik taaguutilik peqataaffigineqarsinnaavoq: Tassa 1500 meterimut nalunneq - 40 kilometerimut sikkilerneq - aamma 10 kilometerimut arpanneq.

Periarfissaq alla tassaavoq sukkalisaarluni triathlornerneq: Tassa 500 meterimut nalunneq - 16 kilometerimut sikkilerneq - aamma 5 kilometerimut arpanneq.

Taaneqareersutut meeqqat timersuutini marlunni unammisinneqassapput. Tamatumani unammissutigineqassallutik 1 kilometerimut arpanneq, malitsiinnarlugu 5 kilometerimut arpanneq naggataatigullu 1 kilometerimut arpanneq.

Peqataaneq akeqanngilaq, taamaattorli nalunnermut atatillugu naluttarfimmut akiliisoqassalluni.

Kikkut tamarmik tikilluaqqusaapput, qanoq piginnaasaqarneq apeqqutaanngilaq, aamma qanoq ittumik sikkileqarnissaq piumasaqaatitaqanngilaq, sikkilit nalinginnaasut, mountainbiket aamma sikkilit sukkaniussutissiat atorneqarsinnaallutik. Sikkilerluni niaqorornaveeqquteqarnissaq, aaqqissuisunit kajumissaarutigineqarpoq.

Peqataaniartut ullormi unammiffissami nalunaaqutaq 9.30 naluttarfiup eqqaani nalunaarsinnaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq