Transparencyp Sermersooq ammanerusumik periuseqarniarnerat nuannaarutigaa

Qanorli oqaaseqaqqusaatigissanersut erseqqivinngitsoq, Transparency Greenland isumaqarpoq.

- Pisortat kisimik oqaaseqarsinnaanerat allannguiffigineqarniartoq, ammanerusumik periuseqalerniarnermi politikkimi atuarsinnaavarput. Tamanna pitsaasumut alloriarnerusoq isumaqarpugut, Transparency Greenlandip siulittaasua, Anita Hoffer oqarpoq.

Aamma atuaruk Asii Chemnitz Narupip Sermersooq ammanerutikkusuppaa

Kommuneqarfik Sermersooq ammanerusumik periuseqarniarnermik politikkilionera transparencyp nuannaarutigigaluarlugu, kommunimi sulisut qanoq oqaaseqartigisinnaanersut erseqqivinngitsoq Transparency isumaqarpoq.

- Sulisut qanoq oqaaseqartigisinnaanissaannut paasititsiniaalluni kommuni ilitsersuusiorsimasoq politikkitaami atuarsinnaavarput, nalunngilarpulli  pisortani atorfillit qanoq oqaaseqartigisinnaanerat nalornissutigineqartartoq, Anita Hoffer oqarpoq.

Kommunimi sulisut oqaaseqarsinnaaneruleraluarlutik suliat ilaanni suli nipangiussisussaatitaassassut, Anita Hoffer nassuiaavoq.

- Pisortani atorfillit oqaaseqarsinnaassuseqarput, kisianni suliat ilaat pillugit nipangiussisussaatitaanerat ammanerusumik pissuseqarnissamik politikkimi aamma soorunami atuarsinnaavarput. Suliaq inunnut ataasiakkaanut tunngalluinnarpat taava suliaq sulisunit aamma oqaaseqarfigineqaqqusaassanngilaq, Anita Hoffer oqarpoq.

Sulisuni sunut tunngasunut oqaaseqarsinnaatitaannerat nalornissutaasartoq, Transparency Greenland misilittagaraa.

- Taamaammat pisortani atorfilinnut najoqqutassanik apriilimi saqqummertussamik atuagaaraliornikuuvugut, Anita Hoffer oqarpoq.