Anita HofferAssi: KNR

Transparencyp nunatsinni pissaaneqarfiusuni atorfillit allattorneqartariaqarsorigai

Nunatsinni pissaaneqarfiusuni atorfillit sulinerminni peqquserluttuliorfigineqarsinnaasut allattorneqartariaqartut, Transparency Greenland isumaqarpoq.

Aningaasaqarnermut nakkutilliisut danskit politikerii atorfillillu 830-t inuiaqatigiinni piginnaaneqarfiusumi atorfeqarnertik pissutigalugu akilerlugit akuersitinneqarsinnaasut allattorsimaffiat saqqummerseqqammerpaat.

Nunatsinni assingusumik allattorsimaffiliortoqarnissaa pissusissamisoortoq, Anita Hoffer Transparency Greenlandimi siulittaasoq oqarpoq.

- Atorfiit aaqqissuussaaneranni qullersaniilerluni piginnaaneqarfeqaleraanni (atorfimmi ileqqorlunnissamut aaqq.) aarlerinartoqalersarpoq, taamaammat tamatumanik nakkutiginninnermi allattorsimaffik ikiorsiisinnaavoq.

Danskit allattorsimaffiat akiliilluni peqquserlutsitsisoqarneranik pasitsaassaqarnermit suliarineqanngilaq, bankilli nakkutiginninnissaanut ikiorsiissutissatut qaffasissumi atorfillit allattorneqarlutik.

Anita Hofferillu inuit allattorsimaffimmiittut pisariaqanngitsumik pasitsaanneqarsimasutut allattorsimaffimmiissorinngilai.

- Isumaqarpunga atorfitsik pissutigalugu pasinartumi inissisimasut. Taamaammallu taakkununnga aallaanerugunanngilaq.

Allattorsimaffiuttaaq qaffasissumi atorfeqartut ileqqorlunnissaat akilersillutillu akuersisinneqarnissaat aarlerinartortaqartoq nakkutigineqartoq takutissavaa.

AAMMA ATUARUK Pissaanermik tigumiallit 830-t ileqqorlunnginnissaat nakkutigineqassasoq

Tamannalu Anita Hofferip inuiaqatigiinni tatiginninnerunermik pilersitsissasoraa

- Allattorsimaffiliuunnaraluarluni aarlerinartumik nakkutiginnilluartoqarnera takutinneqarpoq.

Danskit allattorsimaffianni ministerit, atorfillit folketingimi politikerit matumani Aaja Chemnitz Larsen (IA) Aleqa Hammondilu (attaviitsoq) aamma ilaapput.

Aningaasaqarnermut nakkutilliisut nunatsinnut Savalimmiunullu tunngasunik aamma oqartussaapput, pinerlunnikkulli aningaasarsianik malunnarunnaarsaasarnermut inatsit nutaaq naalagaaffeqatigiinnerup iluani nunani avannarlerniittuni suli atuutilersinneqanngilaq.

Taamaammat nunatsinni politikerit atorfillillu akornanni allattorsimaffiliortoqarnissaa suli piumasaqaataanngitsoq, aningaasaqarnermut nakkutilliisut pinerlunnikkut akingaasarsianik malunnarunnaarsitsisarnermut pinaveersaartitsiviata allaffeqarfiani pisortaq, Stig Nielsen KNR-imut oqarpoq.

Pinerlunnikkut aningaasarsianik malunnarunnaarsitsisarneq pillugu inatsit atuutilerpat nunatsinni savalimmiunilu assingusumik allattorsimaffiliortoqarnissaa Grønlandsbankenip pinerlunnikkut aningaasarsianik malunnarunnaarsaasarnermut immikkoortortaqarfiani akisussaasup, pisortap tulliata, John Jakobsenip qularinngilaa.

- Immikkut maluginiartariaqartut allattorsimaffiliorineqarunik uagut sulinerput oqinnerulissaaq, John Jakobsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat