Transparency: Tusarniaanermut ullut arfineq-pingasut atussallugit sivikippallaarput

- Tusarniaanernut akinissamut piffissaqarfiginngikkaanni, pisarneq maliinnarlugu tusarniaanertut pissuseqarami. Ullut arfineq-pingasut tusarniaanermut ikippallaarput, peqataatitsiniarnertut ilumoorussatut taaneqarsinnaanani. Soorlulusooq iluamik tusarniaanissaq kissaatigineqarsimanngitsoq. Taama pisoqarnera assuarnarteqaarput, Transparency Greenlandip siulittaasua Anita Hoffer oqarpoq.

Kalaallit Nunaata Inuit Pisinnaatitaaffiinut Siunnersuisoqatigiivi aamma isumaqarput tusarniaaneq sivikippallaartoq.

- Tusarniaanermi suna pineqarnersoq paasiniaraanni atuarneqaqqaartarpoq, kingornalu akussuteqartoqartarluni. Erseqqissumik akinissamut piffissaq sivikippallaarpat tusarniaanerup pitsaassusia sunnerneqassaaq, siunnersuisoqatigiit oqarput.

Anita Hofferip arlaannik pisoqartariaqarnera paasisinnaavaa. Tusarniaasarnerilli isumaqassappata, uuma suliarinera sukkavallatsiartoq, siulittaasoq  isumaqarpoq. Inatsisissatut siunnersuummi oqaatigineqartariaqartutut pingaartitaminnik akissuteqarusukkaluarput, kisianni tusarniaanissamut piffissaliussaq sapaatsip akunnerinik pingasunik sivitsorneqartariaqartoq Transparency Greenlandip isumaqarpoq.

Tassami suliat tusarniutigineqartut iserfiginissaat, paasiniaanissaq, nunanut allanut attaveqarnissaq, ilaasortat allat peqataatinnissai naggataatigullu tusarniaanerit isumaqatigiissutigalugit akuerineqarnissat, suliniaqatigiiffiit Transparency Greenlanditut ittut unamminartittarpaat.

- Suna tamarmi piffissartornartarpoq. Tusarniaanerlu sapaatsip akunneranit sisamanit sivikinneruppat, tusarniaanerup pitsaassusia sunnerneqartarpoq, tamallu peqataalluarnissaannut periarfissaat aamma sunnerneqarlutik. Tusarniaanermik piffissaliussaq sivikippallaaraangat innutaasut peqataanissaannut periarfissakitsuararsuussapput.

Transparency Greenland taama isornartorsiuivoq.