Transparency Greenland: Peqquserluttoqartarnera uggornarpoq

- Taamaaliortoqartarnera soorunami uggornarpoq, taamaaliortoqartarnerali ilisimaneqarpoq. Maannalu iliuuseqarfigineqalermat nuannaarutissaavoq. Nakkutilliisarnerummi pissusissamisut ingerlanera nuannaarutissaavoq, matumanili pineqaatissiisoqassanersoq suli nalunarpoq, nuannaarutigeqaarali iliuuseqartoqalermat, Anders Meilvang, Transparency Greenlandimi siulittaasoq oqarpoq.

Suliariumannittussarsiuussisoqaraangat isertortumik, inatsisinilllu unioqqutitsilluni, isumaqatigiissusiortoqartarnera, Anders Meilvangip tupigusuutiginngilaa.

- Tupigusuutiginngilara. Pisortat Kalaallit Nunaanni sanaartortitsisorujussuupput, isertorlunilu isumaqatigiissusiortoqartarmat taamaammat tupinnanngilaq, Anders Meilvang oqarpoq.

Sanaartornermik suliallit isertorlutik isumaqatigiissusiortarnerat  sanaartornermik suliallip Polar Entreprisep avammut saqqummiuppaa, taamatulli saqqummiussaqarnera Polar Entreprisemut kinguneqarnerlussinnaavoq, taamaalisoqarsinnaanerali Anders Meilvangip pinngitsoortinniarpaa.

- Inatsisinik unioqqutitsisoqarneranik pasitsaassinerup kingorna, ilumut pasitsaassap ilumuussusianik inuit ataasiakkaat paasiniaavigisartagassaannik amigaateqarneq nukillaanganarpoq, paasiniaasarfimmillu taamaattumik peqalernissaa uagut orniginartipparput, tassami inuit pasitsaassaqarlutik oqaatiginnittut suliffeqarfinni assigiinngitsuni suliffissaqarsinnaaneri mattunneqarsinnaasarmata, Anders Meilvang oqarpoq.

Aningaasanillu peqquserluttoqarneranik pasitsaassisoqarpat taamaammat orniguffissaqartoqartariaqartoq, Anders Meilvangip ujartorpaa.