Transparency Greenland oqaaseqarsinnaatitaaneq pillugu najoqqutassamik saqqummersitsilerpoq

Suliffimmi pissutsit pillugit tusagassiorfinnut oqaaseqarsinnaaneq killiligaanngitsumillu oqaaseqarsinnaatitaaneq sumut killeqarpa?

Nunatsinni innuttaasut pisortallu apeqqut tamanna akissutissaqartinngikkaat  pissaanermik atornerluinermik akiuiniaqatigiiffimmit, Transparency Greenlandimit  isumaqartoqarpoq.

Taamaattumik atuakkamik najoqqutassamik saqqummersitsinissaq akiuniaqatigiiffiup maanna suliniutigaa.

Pisortani sulisut killiligaanatik oqaaseqarsinnaatitaanerannik killissaarititaasoq pisortanit ilisimaneqaqqissaanngitsoq  pissaanermik atornerluinermik akiuiniaqatigiiffimmiit, Transparency Greenlandimit isumaqartoqarpoq.

Tamassuma erseqqissarneqarnissaa pisariaqarmat atuakkamik najoqqutassamik Transparency Greenland saqqummersitsiniarpoq, siulittaasoq Anita Hoffer oqarpoq.

Najoqqutassamik saqqummersitsinissaq pisariaqarsorineqarpoq 

Napparsimavissuarmi tarnimikkut napparsimasut immikkoortortaqarfiani sulisunut sinniisup Frank Simonsenip  tusagassiorfinnut oqaaseqarsimanera pillugu peqqinnissaqarfimmi qullersaqarfimmit allakkatigut mianersoqqussummik tunineqarnera eqqortuliornerunngitsoq inatsisartut ombudsmandianit aalajangiiffigineqarmat.

Siornatigut taama pisoqarsimaneranik suliaqarsimavugut taamaattumillu iliuuseqarniarsimagaluarpugut  Anita Hofer oqarpoq, taamaattumik  Transparency Greenland  pisortani sulisut killiligaanatik oqaaseqarsinnaatitaanerat pillugu atuakkamik najoqqutassamik saqqummersitsinissamut  piareersarpoq, siulittaasoq Anita Hoffer oqarpoq.

Peqqinnissaqarfimmi sulisut killiligaanngitsumik oqaaseqarsinnaatitaanerat pisortanit unioqqutinneqarpoq Anita Hoffer oqarpoq. Pisortani atorfillit killiligaanngitsumik oqaaseqarsinnaatitaapput,  kisianni suliffiup avataanut oqaatigeqqusaanngitsunik  nipangiussisussaatitaanermullu tunngassuteqartunik oqaaseqarsinnaatitaanngillat,  imaluunniit pisortani suliffeqarfinnut  akornutaasinnaasunik  Anita Hoffer oqarpoq, kisianni suliffimmi pissutsit pineqartillugit  - soorlu ombudsmandip aalajangiinermini innersuussutigigaa -  pisortani sulisut oqaaseqarsinnaatitaapput  pissaanermik atornerluinermik akiuiniaqatigiiffiup  Transparency Greenlandip siulitaasua Anita Hoffer oqarpoq.

- Pissutsit qanoq ittuunerat pisortatigoortumik ilisimaneqarnissaat pisariaqarpoq taamaattumik  pisortani atorfillit oqaaseqarsinnaatitaanerat  pisariaqarpoq suliffimmi pissutsit  ilisimaneqarniassammata, Anita Hoffer oqarpoq.