Transparency Greenland: Naalakkersuisut ammanerusariaqarput
- Naalakkersuisoqatigiit matoqqanerujussuat isumakulunnarpoq, Transparency Greenlandip siulittaasua Anders Meilvang oqarpoq.
Inatsisartunut ilaasortat ataasiakkaat maannamut suliarisimasatik, aningaasarsiornikkullu soqutigisatik, Inatsisartut nittartagaatigut suli nalunaarsorsimanngikkaat atasinnaanngitsoq, suliniaqatigiiffik isumaqarpoq. Inatsisartunut ilaasortat taama nalunaarsuisarnerat 2011-mi juulip qaammataani eqqunneqaraluarpoq.
- Siumut sinnerlugu ilaasortat amerlasuut suli nalunaarsuisimanngillat, Transparency Greenland allappoq, taamatullu pinngitsoorani nalunaarsuisoqartalernissap eqqunneqarnissaa, Inatsisartut siulittaasuata suliniutigisariaqaraa oqaatigalugu.
Aapparisat, naalakkersuisunullu ilaasortat aapparisaallu taamaaliortalertariaqartut, suliniaqatigiiffik aamma isumaqarpoq.
Naalakkersuisut ammanerunissamik suliniuteqartariaqartut, Transparency Greenland isumaqarpoq, soorlu aamma ilaasortat suliaasa aningaasartuutaallu avammut saqqummiunneqartariaqartut ujartoraat.
