Transparency: Akissuteqarniaasaartoqartarnera tamat oqartussaaqataanerannut ajornartorsiortitsivoq

Naalakkersuisuusimasup Miiti Lyngep uiata misissuinissamut akuersissummik pigisaqarneranut aammalu naalakkersuisut siulittaasuata naalakkersuisoqarfiani pisortap aningaasaqarnermut nunami namminermullu naalakkersuisoqarfimmi pisortamik atorfinitsitsinermut akisussaaffia pillugu Aleqa Hammondip qanoq isumaqarnera apeqqutigineqarsimavoq.

Transparency Greenlandip siulittaasuata tamat oqartussaaqataanerannut ajornartorsiutit taavaa, Demokraatillu siulittaasuat narrassimaarpoq isumaqarlunilu Namminersorlutik Oqartussani annertuunik ajornartorsiortoqartoq.

Transparency Greenlandip siulittaasuata Anders Meilvangip aamma naqissuserpaa Naalakkersuisut sulisitsisuminnut Inatsisartunut akissuteqarniarlutik paamaarussisarnerat tunngaviatigut ajorluinnartoq.

- Tamat oqartussaaqataanerannut ajornartorsiortitsivoq, inuiaqatigiinnimi pissaaneq pingasoqiusanngorlugu avinneqarsimavoq, inatsisiliortullu inatsisiliamik piviusunngortinnissaannut Naalakkersuisut atorfinitsitaraat. Inatsisartut aamma pissaanerup ingerlanneqarneranik naammaginngisaqarunik apeqqutimiik akissuteqarfigineqarnissaannut pisinnaatitaapput.

Anders Meilvang apeqqutit pineqartut ilisimaqqissaanngikkaluarlugit pisut isornartoqarsinnaasut pillugit piffissaagallartillugu akissuteqartoqartarnissaa tikkuarpaa. 

- inatsisinik atortitsisut taama sivisutigisumik paamaarussaqassappata ajorluinnartuussaaq, pingaartumik apeqqutinut isornartoqarsinnaasunut tunngatillugu.

Aleqa Hammond aamma Vittus Qujaukitsoq kingusinaarujussuarlutik akissuteqartuusut oqaaseqartinniaraluaratigut, ataatsimiittoqarnera angalasoqarneralu pissutigalugit iluatsinngitsoorparput.