Transparancy: Qitiusumik allaffeqarfik paatsiveqanngilaq

Nunatsinni qitisumik allaffeqarfimmi piffissami kingullermi torersumik ingerlatsisoqannginnera Meilvangip DR-ip aallakaatitassiaani Orienteringimi oqaaseqarfigaa, allaffeqarfissuarlu pillugu oqaaserisai sakkortungaatsiarput.

-Qitiusumik allaffeqarfiup piffissami kingullermi suliarpassui ajorluinnartumik ingerlanneqarsimapput. Ingerlatsiviit ajorluinnartumik inissisimapput allaffeqarfillu ajornartorsiorfiusupilussuuvoq, tamannalu siunissami aatsitassanik suliniutitta piviusunngortinnissaanut aningaasaliisussarsiornissatsinnut ajornakusoortitsisinnaavoq, Anders Meilvang DR-imut oqarpoq.

Allaaserisarpassuit aamma TV-kkut radiokkullu aallakaatitassiarpassuit pissutigalugit nunatsini allaffissornikkut atorfinnut qullasissunut sulisussanik piukkunnartunik pissarsisoqarsinnaajunnaarneranik kinguneqarsinnaapput, tamannalu Kalaallit Nunaannut kalaallinullu siunissami ajorluinnartuuvoq.

-Pisortaqatigiit tamakkerlugit taarsernissaannik aalajangerneq suliffeqarfimmut tamarmut sunniuteqarpoq. Taamaammat allaffissuaq pitsaavallaanngitsumik ingerlavoq. Kalaallit Nunaata avataaniittut siooranartutut isigissavaat Kalaallit Nunaallu tatiginanngitsutut isigilerlugu, tamannalu Kalaallit Nunaata aningaasaqarneranut sunniuteqartupilussuusinnaavoq, Meilvang DR P1-ip aallakaatitassiaanut Orienteringimut taama oqarpoq.

Meilvangip apersorneqarnera uani tusaasinnaavat (aallakaatitassiaq danskisoorpoq): http://www.dr.dk/P1/orientering/indslag/2013/09/18/162334_1.htm