Biilit misissorneqartut akisaassaannik pullattartunik pullatsitsisartumik atortoqarput, atortorlu taanna biilinut atortussiortartumit TRW Automotive Holdingsimit - teknikkikkut atortorissaarusiortartumit ZF Friedrichshafenimit pigineqartumit - tunisassiaavoq.Assi: Mike Mozart/Flickr

Toyotap biililiani millionilikkaat uterteqqugai

Biilinik tunisassiortartup, Toyotap, biililiai millionilikkaat ajoquteqarnerat pissutigalugu akisaasaat pullattartut ajutoornermi pullanngitsoorsinnaapput.

Toyotap nunarsuarmi tamarmi biilit 3,4 millionit ajoquteqarmata uterteqquai.

Toyota tusagassiutinut Danmarkip nalunaaqutaa malillugu marlunngornermi unnukkut taama nalunaaruteqarpoq.

Biilit uterteqquneqartut ajoquteqarmata akisaasaat pullattartut ajutoornermi pullanngitsoorsinnaapput.

Amerikami biilit 2,9 millionit uterteqquneqartut ilagaat, taakkualu tassaapput Corollat 2011-imiit 2019-imeersut, Matrixit 2011-imiit 2013-imeersut, Avalonit 2012-imiit 2018-imeersut aamma Avalon Hybridit 2013-imiit 2018-imeersut.

Europami taamalu Danmarkimi biilinik utertitseqqusisoqarsimanngitsoq, Danmarkimi Toyotap ilisimatitsissutigaa.

Akisaasap pullattartup pullanngitsoorneranik pissuteqartumik maannamut ataasiarluni ajunaartoqarsimasoq nalunaarutigineqarpoq.

Amerikamiut nunani tamalaani aqqusinersuarni angallannerni aarlerinartoqannginnissaanik nakkutilliisartuisa (NHTSA) biilinik tunisassiortartorpaaluit biililiaat 12,3 millionit akisaasaasa pullattartut ajoquteqarnersut paasiniarlugu apriilimi misissorpaat, Toyotallu biilit uterteqqusai misissugaasa ilagaat.

Biilit ajoquteqarnerat inuit arfineq-pingasut ajunaarnerannut pissutaasimasinnaasut

Ajutoornermi ataatsimi ajunaartoqarneranik kinguneqartumik Toyotap biililiaanik marloriarluni ajutoortoqarsimasoq NHTSA-mit apriilimi paasineqarpoq, biilillu ajutoortut aappaata sikringiiarsimanera akisaasaata pullattartup pullanngitsoorsimaneranut pissutaasimassangatinneqarpoq.

Misissorneqartartut tassaapput Toyotap, Fiatip Chryslerip, Hondap, Hyundaip, Kiap Mitsubishillu biililiaasa 2010-miit 2019-imeersut akisaasaat pullattartut.

Biilit misissorneqartut akisaassaannik pullattartunik pullatsitsisartumik atortoqarput, atortorlu taanna biilinut atortussiortartumit TRW Automotive Holdingsimit - teknikkikkut atortorissaarusiortartumit ZF Friedrichshafenimit pigineqartumit - tunisassiaavoq.

Akisaasallu pullattartut ajoquteqarnerat inuit arfineq-pingasut ajunaarnerannut pissutaasimasinnaasut, NHTSA-p aamma ilisimatitsissutigaa.

Kia, Hyundai aamma Fiat Chrysler biilinik 2,5 millioninit amerlanerusunik aamma uterteqqusinikuupput, biilillu taakkua uterteqqusimasaat TRW Automotive Holdingsip biilinut atortussiaanik atortoqarput.

Biilit taakkua ajoquteqarnerat inuit biilimik ajutoorlutik ajunaarsimanerannut pissutaasimasinnaasut, Fiat Chryslerip 2016-imi oqaatigaa.

Hyundaio Kiallu 2018-imi ilisimatitsissutigaat, biilitik ajoquteqarnerat inuit ajunaarnerannut pissutaasimasinnaasut.

Toyota biilitik ajoquteqarnerannik ajunaarsimasinnaasut qassiunerannut tunngasumik suli oqaaseqanngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat