Toyota USA-mut taarsiisussanngorpoq

Japanimi biiliorfissuaq Toyota USA-mut millionit koruunilikkaanik taarsiissalluni akuersivoq. Suliffeqarfissuup biililiaani arlalissuarni speederit tutisaataasa ajoquteqarsimanerinut paasissutissanik nassuiaateqartarsimannginnera pissutaavoq.
apriilip 19-at 2010 08:23

Taarsigassat katillugit 90 millionit koruuniupput, Businessweekimilu allaaserisat naapertorlugit aatsaat taama annertutigisumik taarsiisoqassaaq. Taarsiinissamut akuersinermigut tamakkiisumik akisussaasuunini Toyotap nassuerutigaa, USA-mi atorfilik oqarpoq.Danmarkip Radioata nittartagaani tamanna allaaserineqarpoq.

USA-mi angallannermut ministereqarfimmiit qaammammi uani siusinnerusukkut oqarput, speederit ajoquteqarnerat pillugu piffissaagallartillugu biililiorfissuup kalerriussisimannginnera inatsisinut naapertuutinngitsoq, speederimmi ajoquteqarnerat ulorianartorujussuummat.

Maannakkummi paasineqarpoq, speederit kukkuneqarnerat Toyotap qaammatini ikinnerpaamik sisamani paasereeraluarlugu kalerriussimanngikkaa, naak biilinik ingerlatsisumut ulorianarluinnaraluartoq.

Biilit 2 millioninit amerlanerit Toyotap USA-miit utertereerpai, nunarsuarlu tamakkerlugu 8 millioninit amerlanerit utertereerlugit.