Tour de France matuneqartariaqaraluarpoq

Michael Rasmussen sikkilertartoqatiminit Rabobankimit soraarsitaanermi kingorna taamalu Tour de Francemit ilaajunnaarsitaanermi kingorna toqqorsimavoq. Danskip taassuma sukkaniunnersuarmit ilaajunnaarsitaanera Frankrigimi aviisinit allaaserineqaqaaq aviisillu allapput sukkaniunnersuaq matuneqartariaqaraluartoq. Kisianni tamanna piviusorsiortuunngitsoq aningaasanillu naleqarpallaartoq Københavnimi Handelshøjskolemi timersorneq pillugu aningaasarsiornermik ilisimasalik Troels Troelsen oqarpoq.

- Ukiormanna Tour de France 40 million euronik imaluunniit danskit koruuninngorlugit 300 million koruuninik sinneqartoorfiussasoq naatsorsuutigineqarpoq taakkualu Tour de Francemik piginnittut iluanaarutigisussaavaat, taama oqarpoq Troels Troelsen.

Ekstra Blademi aviisiliortup Lars Vergep nunarsuarmi sikkilerluni sukkaniunnerit sakkortunersaata matuneqarnissaa piviusorsiortuunnginnerarpaa, naak isumaqaraluarluni matuinnarneqartariaqaraluartoq.

- Tour de France ima saassutarineqartigaaq, assigalugu tilluuttartoq seeqqummersimasoq dommerimit kisitsiffigineqartoq. Timersuut ingerlaqqissinnaassappat, oqartoqartariaqaraluarpoq sukkaniunneq maanna unitsipparput sukkaniullunilu unammersuartarnerup qanoq ingerlaqqissinnaanera oqallisigalugu, Lars Verge oqarpoq.

Tassa oqartoqarsinnaavoq timersornermiit aningaasat pingaarnerupput. Inuit 12 millionit missaasa aqqusinertigut sukkaniunneq malinnaaffigaat, taakkua sisamararterutaat takornariaapput. Takornariat taakkua 3 millioninik amerlassuseqartut franskinit nuannaarutigineqaqaat.

- Mianersortunnguamik oqarutta takornariat agguaqatigiissillugu ullut tallimat Frankrigimiittartut, ullullu taakkua ingerlaneranni tamarmik immikkut 5.000 koruuninik aningaasartuuteqartartut, tassa neriniartarfinnut, hotelinut, angallannermullu. Taava piffissami matumani nunaannarmi immaqa takornariartoqarpiarneq ajortumi ulluni tallimani 15 milliard koruuninik takornariarnermik ingerlatsisunut isertitsissutaasarput. Taamaalilluni oqartoqarsinnaavoq takornariarpassuit sukkaniuttunik isiginnaariartut Frankrigip aningaasarsiutigilluartarai. Taamaattumik sukkaniunnersuup matuneqarsinnaanera takorlooruminaappoq, Troels Troelsen oqarpoq.