Tour de France KNR-ikkut aallakaatinneqassaaq

Ullut marluk qaqqani assoroornartumik unammereerlutik arfininngorpat ataasiakkaarlutik aallartarlutik unammissapput, ajoraluartumillu unammersuaarneq tamakkerlugu KNR-TV-kkut malinnaaffigineqarsinnaasimanngilaq. Tuppallersaatitulli ullut unammiffiusut kingulliit sapaatip akunnerata naanerani toqqaannartumik aallakaatinneqassapput.

Arfininngorpat ataasiakkaarlutik aallarlutik unamminerit KNR-TV-kkut ullaakkut qulingiluanut qiteqquppat aallakaatinneqalissapput, aqaguanilu aamma qulingiluanut qiteqquppat aallakaatitsineq aallartissaaq. Sapaammi unammisut Parisimut ingerlaaqatigiinnerat Champs-Élysées-imilu sukkaniunnersuaq ilimagineqartoq aallakaatinneqassaaq.

Franskeq Thomas Voeckler tupaallatitseqaluni unammersuaarnerup tujuuluaraa sungaartoq maannakkut atorpaa ajugaasussatut ilimagineqartunit siullernit minutsinik marlunnik sukkanerulluni. Ajugaasussatut ilimagineqartuni siulliuvoq Frank Schleck, Cadel Evansimit tullersorteqarluni, taassuma kingornaniipput Andy Schleck, Ivan Basso, Samuel Sanchez arfineq aappaattullu inissisimavoq ukioq kingulleq ajugaasoq Alberto Contador, maannamut siuttuusumit minutsinik sisamanik arriinnerulluni.

Siuttunut ilanngutissanersoq ukiopq kingullertulli ajugaaqqissanersoq - maanna Bjarne Riisimut sikkilertuulluni - piffissap takutikkumaarpaa. Sapaatip akunnerata naanerani Tour de Francemi unamminermi ullut marluk kingulliit qulingiluat qeqqaniit marlut tungaannut KNR-TV-kkut aallakaatinneqarneranni tamanna malinnaaffigisinnaavat.