Tour de France ingerlaqqissaaq
Angut, sukkanerpaap tujuuluanik sungaartumik tujuululik, danskeq, Michael Rasmussen, holdiminit ilaajunnaarsitaavoq, kingusinnerusukkullu soraarsitaalluni. Tamatumunnga pissutaavoq sikkilerluni sukkaniunnissarsuaq sioqqullugu qaammammi ataatsimi sumiissimanerluni salluliuutigisimammagu. Taamatut aalajangerneq sukkaniunnermik aaqqissuussisunut oqitsuinnaasimanngitsoq, tusagassiortunik ullumikkut katersortitsinermi paasinarsivoq.
Sukkaniunnermik aaqqissuussisut taamatut aalajangerneq oqiliallaatigigaat malunnarpoq. Taamaalillutimmi ajugaasup kingusinnerusukkut peersinneqartariaqalersussap isumaginissaa pinngitsuussagamikku. Aamma oqaatigineqarpoq ullut arlalialuit matuma siornagut tusagassiortunik katersortitsinermi Rasmussenip apeqqutinut akissutai naammaginanngitsut. Ullumikkullu ilisimalikkatik juunimilu iliuuserisimasai tunngavigalugit Rasmussen sukkaniunnersuarmut ilaatinneqarsimasariaqanngikkaluartoq.
Sikkilerluni sukkaniunnersuaq sooq taamaatiinnarneqannginnersoq apeqqutigineqarmat, oqartoqarpoq tamatumunnga pissutaatinneqartut tassaasut aqqusinerni isiginnaartorpassuit, aaqqissuussisarnerup ukiuni 103-ni ingerlanneqareersup ingerlaqqittariaqarnera, nukkassaatitorsimasullu ima nakkutigineqartigimmata salluliorluni ajugaasoqarsinnaanani. Aamma oqartoqarpoq sukkaniunnersuarmi nukkassaatinik atuineq ullumikkut ippassarnit isumannaannerulersimasoq.
Inuit sukkaniunnermut malinnaasut ullumikkut qanoq isumaqarnerat apeqqutigineqarmat, oqartoqarpoq Michael Rasmussen ippassaq nuannarineqanngikkaluaqisoq inuit ingerlaqqittariaqartutut misigisimasut. Taamaattorli pisimasoq sukkaniunnersuarmut imaaliallaannaq qaangeruminaatsuusoq.
