"Torrak" ukioq manna pissanngilaq

Torrak, ukioq manna pinngitsoorpoq. Torrak taannaavoq ukiorpassuanngulersuni atuartut ukiaanerani atuanngiffeqarnerat iluatsillugu sinerissami atuarfiit ilaanni illup iluani isikkamik arsarlutik unammissutigisartagaat nuannarineqaqisoq.

Atuartut ukioq manna Torraap ingerlanneqannginnera pillugu paasitinneqannginnertik paatsuungassutigaat.

Tamanna Radioavisimiit akissutissarsiniarlugu Torrak-mut aningaasaliissuteqartartut ilaannut avisip Sermitsiap aaqqissuisuanut Poul Krarupímut paasiniarparput.

-Aaqqissuussisoqanngilaq, aamma aggersarneqanngilagut. Aaqqissuisartut taamaatinnikuupput, taartissaanillu pissarsisoqarsimanani.

Torrammut ukiut tamaasa aningaasaliisartut aningaasaliinissaminnut piareersimagaluartut, Poul Krarup oqarpoq.

- Aammami pingaartikkatsigu atuartut ukiaanerani atuanngiffeqarnerminni nuannersumik misigisaqassasut, ukiullumi tamaasa taamaaliortarpugut. Torrammik aaqqissuisartussat atuarfimmik ilisimasaqartuusariaqartut tamannalu peqataaffigissagitsik Poul Krarup oqarpoq.

Atuartut isikkamik arsarlutik unammisarneri aallarteqqaarmata ilinniartitsisut aaqqissuisuusarput, tamatuma kingorna Grønlandsbanki aaqqissuussisalerpoq, taamaatillinili.

- Pitsaalluinnassangaluarpoq atuarfimmut attaveqartumik aaqqissuussisartoqalissappat.

Poul Krarup atuartunut oqarusuppoq, ukioq manna Torrammik taallugu unammisoqannginnera aamma namminneq ajuusaarnartuutikkitsik.

Atuartut isikkamik arsarlutik unammisinneqartarnerat 1960-kkunili sinerissami illoqarfinni arlalinni ingerlanneqartarpoq.