Torontomi kalaallit filmiliaannik nittarsaassisut

Kalaallit filmiliaat filmfestivalertoqarnerani eqqartorneqartartut maluginiarsimagitsik, Karsten Heilmannip, filmiliornermik aqutsisutut imagiNATIVE Film festivalimi peqataasup oqaatigaa:

- Nunat inoqqaavisa akornannut pigaangatta eqqartorneqartupilussuusarput, nunarput taaneqallattaasarpoq, taava uagutsinnut aamma assut pissarsiaqarnarpoq, misigisaq pikkunarluni. Ima misiginarami ilisarnarluni, akornannut piinnavillutalu "ikkutiinnavikkatta", kikkuunerlutalu apeqquserneqarpasinnatta, filmiliornermik aqutsisoq Karsten Heilmann taama oqarpoq.

Filmiliat inuiaat assigiinngitsut ulluinnarni inuunerisa killiffiannik aamma takussutissaasinnaasut maluginiarsimallugu Karsten Heilmannip oqaatigaa:

- Filmiliorneq nuannaarniutaannaannginnami, uagut suliavut arlallit immaqa maanga, Torontomut, pigatta malugilerpagut aamma sakkortulaartut, tassa filmini takutitavut inuiattut atugarisatsinnut aamma tarrarsuutaallutik pisut, Karsten Heilmann oqarpoq.

imagiNATIVE Film & Media Arts Festivalimullu siunissami ataavartumik peqataasalernissartik naatsorsutigigaat Karsten Heilmannip oqaatigaa:

- Attortinnartupilussuuvoq, filmerpassuit takuagut. Ilai atugarliungaatsiarsimapput, kisianni aamma nuannersortaqarput, tissinartortaqarput aamma ersinartuliaqarpoq. Taava uanga nammineq immaqa oqaatigissagukku qasseerpassuariarlunga attortingaatsiarpunga, qullikuulaartarlutalu pivugut soorunami. Taava ukua nunap inoqqaaqatigut allat aamma malunnartoq taamatut attorteqqasupilussuusartut, filmiliornermik aqutsisoq Karsten Heilmann taama oqarpoq.

17-issaa imagiNATIVE Film & Media Arts Festivalertoqarpoq, Kalaallillu Nunaannit ukioq manna peqataasut tassaapput:

Emile Hertling Peronard, Ujarneq Fleischer, Pipaluk K. Jørgensen, Aká Hansen, Karsten Heilmann kiisalu Nukaaka Coster-Waldau.