Torlorsortarneq piorsarsimassutsikkut kingornussat siullersaattut suaarutigineqartoq

Naggueqatigiit Inuit torlorsortarnerat Quebecimi piorsarsimassutsikkut kingornussat siullersaattut suaarutigineqarpoq. Piorsarsimassutsikkut kingornussat tassaanerusaraluarput eqqaassutissiat nunallu ilaat, soorlu Ilulissani kangia taamatut pineqarsimasoq.
januaarip 31-at 2014 08:42

Ileqqutoqqalli immikkut ittut aamma pisortatigoortumik piorsarsimassutsikkut kingornussatut inissinneqarsinnaanerat aalajangiunneqarsimavoq. Quebecimi piorsarsimassutsimut naalakkersuisup, Maka Kottop, Montrealimi eqqumiitsulianik katersugaasivimmi nalliuttorsiorpalaartumik katerisimaarnermi, Inuit torlorsortarnerat piorsarsimassutsikkut kingornussatut inissinneqarnera suaarutigaa. Charlie Angark, Nunavimmi piorsarsimassutsikkut ilisimatusarfimmi Atavami siulittaasoq Nunavimmiut tamaasa sinnerlugit qujassuteqarpoq.

Inuit torlorsortarnerat akilinermiutut katajjaniq-mik taaneqartartoq immikkuullarissuuvoq ukiunilu tuusintilinni Canadap issittortaani arnamit arnamut ingerlateqqinneqartarsimalluni.

Erinarsortartoq tusaamasaq Kuujjuarmeersoq Taqralik Patridge katerisimaarnermi oqaatigaa torlorsortarneq inuusuttuugallarami soqutigineqarpallaarsimanngitsoq utoqqaat kisimik aallutarimmassuk, maannali arnat inuusuttut ilinniassallugu soqutigilersimagaat oqaatigaa.

-Naggueqatigiit Inuit immitsinnut tulluusimaarutigileraluttuinnarpugut, Taqralik Patridge oqarpoq.