Torernerusumik oqallinnissaq Kuupik Kleistip ujartorpaa
Nunatta avammut tunisinera ukiumi qaangiuteqqammersumi malunnaatilimmik annertuseriarsimasoq, naalakkersuisunut siulittaasup Kuupik Kleistip ukiortaami oqalugiaammini maluginiagasa ilagaat.
2010-mut sanilliullugu siorna 2011-mi aalisarnermi isertitat 376 millionit koruuninik annertunerusimapput.Tassalu Nunatta avanmmut tunianermini isertitai ukiup siulianut sanilliullugit 25 procentingajammik qaffariarsimallutik. Tassa aalisakkat assigiinngitsut malunnavissortumik akigissaarnerulersimapput.
Taamammat aalisarneq pillugu torernerusumik oqallinnissaq Kuupik Kleistip ujartorpaa, tikkuarlugulu oqallinneq ukiumi qaangiutereersumi sakkortusimasoq:
- Aalisarnerup aaqqissuussaanerata aamma aqunneqarnerata allanngortikkiartornerani naalakkersuinikkut oqallinneq sakkortusimavoq aamma siornatigut takuneqarsimanngitsumik akersuuffiulluni, naalakkersuisut siulitatasuat Kuupik Kleist taama oqarpoq.
Taassumalu uggoraa, aalisarneq pillugu oqallinnermi ajortuinnarnik ineriartortoqartoq oqariartuutigineqarniartarmat.
- Naak aalisarneq ataatsimut isigalugu siornatigumut naleqqiullugu pisassatigut annikillileriffigineqanngikkaluartoq aammalu pingaartumik akit qujanartumik qaffakkiartornerisigut aalisarnermi aningaasarsiorneq pitsanngoriangaatsiarsimavoq ilaatigullu tamanna suusupagineqarluni aalisarnerup ingerlanera ajortuinnarmik eqqartuiffigineqarsimammat.
Tassalu torernerusumik pissuseqarluni eqqornerusunillu tunngaveqarluni oqalllinnissaq ujartorpaa.
- Soorlu aalisagartassiissutit eqqarsaatigalugit oqaatiginiarneqartarpoq massakkut naalakkersuisuusut ikilisaarujussuarsimasut, arlaleriarluni tamanna oqaatigineqartarpoq, eqqoranilu. Aalisagartassiissutaasarsimasut ukiut ingerlaneranni qiviaraanni allanngungaanngillat ilaatigullu aalisakka ilaannut qaffanneqalaartarsimallutik. Aamma aalisarnerup ataatsimut isigalugu aningaasarsiutaanerata eqqartorneqarnerani oqaatiginiarneqartarpoq aningaasarsiornikkut ajorluinnartumik ingerlasoqartoq, kisianni kisitsisit tutsuiginartut aamma pisortatigoortut takutippaat qaffakkiartuinnartumik ukiuni kingullerni aningaasarsiornikkut isaatitsissutaasoq.
Aamma aalisarnermit tunisassiat MSC-imik ilisarnaaserneqarnissaat Nalakkersuisut siulittaasuata ukiumi matumani sulissutissatut pingaartutut isigaa;
- Tuniniaanermi unammillertigut tamarmik taamatut ilisarnaasersuinermik anguniagaqarput ilaatigullu misigisimavugut kinguussaanaveersaartariaqarluta unammillertitsinnut naleqqiulluta. Takuneqarsinnaasoq tassaavoq aalisakkat taamatut ilisarnaasersukkat akigissaartinneqarnerusut ilaatigullu pisiniartartut aningoorsuit nungusaataanngitsumik aalisarneqartutut ilisarnaasersugaangitsunik pisiumajunnaartartut, taamaattumik siunissaq eqqarsaatigalugu anguniagaq pingaartupilussuuvoq. Pingaaruteqarnerpaavoq aalisarnermik inuussutissarsiuteqartut siunissaqarlutik aammalu tunisassiamik akigissaartinneqarnissaat qulakkeerneqarnissaa, naalakkersuisut siulittaasuat Kuupik Kleist taama oqarpoq.
