Torben M. Andersen: Kukkusumik issuarneqarpunga
Kalaallit Nunaata aningaasarsiornerani aaqqissuusseqqittoqanngippat ukiut pingasut tulliuttut ingerlaneranni ajalusuussasoq Torben M. Andersenip oqaatigigaa aviisip Børsenip allaaseraa, Andersenilli oqaasii paatsoorneqarsimasut, Siunnersuisoqatigiit siulittaasuata maanna oqaatigaa.
- Kalaallit Nunaata aningaasarsiornerata ajalusuuinnissaa oqaatiginngilara. Aaqqissuusseqqinnerilli taamanikkussamut aallartinneqarsimanngippata aningaasarsiornerup ingerlanerliulernissaa, innuttaasullu amerlasuut Kalaallit Nunaannit allamut nuuttalernissaat aarlerineqarsinnaasoq oqaatigaara, Torben M. Andersen oqarpoq.
Tassa ima paasillugu:
Politikerit aningaasarsiornerup iluani aaqqissuusseqqinnernik ukiut tulliuttut pingasut ingerlaneranni akuersissuteqanngippata, Kalaallit Nunaata aningaasarsiornerata aaqqiiviginiarneqarnissaanut piffissaasualissasut Torben M. Andersenip oqaatigaa.
Taassuma aaqqissuusseqqinnermi ilinniartitaanermi, suliffeqarfiit namminersortut kiisalu pisortani sipaarniarnerit imminut napatissinnaalernissamut suliassatut pingaarnertut tikkuarpai.
- Tamarmik pingaaruteqarluinnarput, taakkuli politikkikkut aalajangiinermik pisariaqarput. Kingunerimi ukiut arlaqartut qaangiuppata aatsaat malunniukkumaarmata, Torben M. Andersen KNR-imut oqarpoq.
Aamma atuaruk Aviisi: Nunatta aningaasaqarnera ajalusuussaaq
Kalaallit Nunaatali ataatsimoortumik tapiissutit aqqutigalugit qularnaveeqqusigaasutut ippoq, taamaammat nunatta aningaasaqarnerata ajalusuuissinnaanera pinavianngitsoq Torben M. Andersen isumaqarpoq.
Taamaattorli aningaasaqarneq siuariartunngippat ineriartortoqaranilu innuttaasut nunatsinnit nuuttartut amerliartussasut aarleqqutigaa.
- Piviusorsiorneruvoq oqassalluni iliuuseqartoqanngippat taava unittoortoqassaaq. Aningaasaqarneq arriippallaamik ineriartussappat ajornartorsiutit amerligaluttuinnassapput. Tamannalu innuttaasut noorarnerannik kinguneqassalluni, Torben M. Andersen oqarpoq.
Innuttaasut 200-t nunatsinni inuusimasut nunarput qamillugu nuupput, inunngortullu 200-nit ikinnerullutik.
Nunatta aningaasaqarneranik naatsorsuinerit naapertorlugit nunatta aningaasaqanara patajaatsumik ingerlalissappat 2030-p tungaanut ukiumut 750 millionit koruuninik sipaartoqartariaqarpoq.
