Torben M. Andersen: Aningaasaqarneq eqqarsaatigalugu aaqqissuusseqqittoqartariaqarpoq

Siunissami Nunatta aningaasaqarnikkut patajaannerunissaa eqqarsaatigalugu, aningaasanut inatsisip aappaagumut atuuttussap qanoq aningaasalersorneqarnissaanik periuseq aalajangiunneqartoq naammaginanngilaq, taama isumaqarpoq Nunatta Aningaasaqarneq pillugu siunnersuisoqatigiivisa siulittaasuat, Torben M. Andersen.

Nunatsinni atugarissaarneq eqqarsaatigalugu aamma sulisoqarnermut tunngasut eqqarsaatigalugit, tamanut sakkortuumik attuisunik Naalakkersuisut siunissami aalajangiisinnaanerat avaqqunneqarsinnaanngitsoq, Torben M. Andersen aamma oqarpoq.

- Taamaammat maanna apeqqutaaginnalerpoq, aaqqissuusseqqinnernut annertuunut siunnersuutit qaqugu piviusunngortinneqassanersut qanorlu imaqassanersut apeqqutaaginnalerluni.

Aaqqissuusseqqiinerit pisariaqartut politikerinit qangali oqaatigineqartarpoq. Taama eqqarsaasersornerit piviusunngortinneqarnissaasa aallartisarneqarnissaat, Torben M. Andersenip maqaasivaa imalu nangilluni.

- Aaqqissuusseqqinnerilli aallartippata, tamanna kikkunnut tamanut sakkortuumik eqquinissaa avaqqunneqarsinnaassanngilaq.

Torben M. Andersenip neriuutigisimagaluarpaa, aningaasanut inatsisip aappaagumoortup suliarineqarnerani, Nunatta karsiata siunissaq ungasinnerusoq eqqarsaatigalugu isertitariumaagassai, tamassumunngalu ajornartorsiutaasinnaasunik aamma pillugit oqallittoqarnissaa.

Aningaasanulli inatsit siunissaq ungasippallaanngitsoq, tassa 2014 eqqarsaatigalugu, Naalakkersuisoqatigiit pitsaasumik aaqqiisimasut, Torben M. Andersenip oqaatigaa.

- 2014 kisiat eqqarsaatigigaanni aningaasanut inatsit ajunngitsumik inissinneqarpoq. Tamassumunnga pissutaaneruvoq aningaasanik ataasiaannarlugillusooq isertitassanik nassaartoqarneratigut, taakkuli tassa ataasiaannarlugit atugassaapput.

Nunatsinni atugarissaarnerup kissaatigineqarnerata kinguneranik aningaasaqarnerup allanngortinneqarnissaa, maanna Naalakkersuisuusut sulillutik aallartikkamilli oqallisigisimanngikkaat, Torben M. Andersenip oqaatigaa.

- Aap 2014 eqqarsaatigalugu aaqqiisoqarpoq kisianni tassa aqqut ajornannginnersiorlugu ikkannersiorlugulu aaqqiisoqarpoq piffissaq ungasinnerusoq eqqarsaatigineqarani.

Torben M. Andersenip ujartorpaa, politikerit maanngagaaq oqallittariaqalersut utoqqalinersiaqartarneq, qanoq sivisutigisumik sulisoqartassaneranik, akileraaruseeriaaseq allallu aningaasanik atuinermut tunngasunik. Tassami politikerit isumaqassanngimmata suna tamarmi nammineerluni aaqqissinnaasoq.

- Aaqqissugassat piffissaq sivisooq atorlugu aatsaat aaqqinneqartarput. Aqqissugassallu uninngatiinnaraanni soorunami aaqqinniarneri sapernarnerulersarlutik.

Nunatsinni aningaasaqarneq pillugu siunnersuisoqatigiit siulittaasuat, Torben M. Andersen taama oqarpoq.