Toqutsisutut pasisaq tarnikkut misissugassanngortinneqarpoq
Angut 19-inik ukiulik Sisimiuneersoq, Louise Hegelundimut suliamut tunngatillugu politiinit pasineqartoq, Sisimiut Eqqartuussiviata ippassaq aaliangerpaa suli qaammatini pingasuni tigummigallagaaqqissasoq tarnikkut misissorneqassalluni.
- Suliami uppernarsaatissaqarluarnera tunngavigalugu suli tigummigallagassanngortinneqarpoq, massakkullu tarnikkut misissorneqarnissaa aallartinneqalerpoq, Politimesterip tullia Bjørn Bay oqarpoq.
- Pasineqartup tarnikkut misissorneqarnerata inernera qaammatit pingasut qaangiuppata naammassineqassappat, taava suliaq eqqartuussivimmi suliarineqarsinnaalissaaq, Bjørn Bay oqarpoq. Taamaattoqanngippalli suliap suli sivitsoqqinneqarnissaa ilimagineqarsinnaasoq oqaatigalugu.
Apriilimi Politiit inuup sananeqaataanut ilisaarnaatitut takussutissaq angummeersoq nassaarivaat, juunimilu angut inuusuttoq 19-inik ukiulik Sisimiuneersoq, toqutsisutut pasillugu tigusarivaat.
