Toqutsisup tigummigallarneqarnera sivitsorpaat

Tasiilami ukiortaami toqutsisuusutut pasineqartup tigummigallarneqarnera, sapaatit akunnerinik sisamanik sivitsoqqinneqarpoq.

Tasiilami kultureqarnermut atuarfeqarnermullu pisortaq Rolf Geisler, ukiortaap ullaavani 13-eriarluni savimmik kapoorneqarluni toqunneqarpoq.

Rolf Geisler-ip aappaa, aallaqqaammut pasineqarluni tigusarineqaraluarpoq, sapaatilli akunnera ataaseq qaangiummat, angut 19-inik ukiulik pasineqalerluni tigusarineqarpoq, taannalu toqutsisimasutut politiinut nassuerpoq.

Qaammatini kingullerni arlaqalersuni, angut inuusuttoq toqutsisimasutut pasineqartoq, eqqarsartaatsimigut misissorneqarpoq.

Pasineqartup sianissusaata misissorneqarnera naammassineqaqqammivoq, maannakkullu naliliisussanut, Retslægerådimut nalunaarusiornera nassiunneqarluni.

Angutip tigummigallagaanermi sivitsorneqarnera akuerimmagu, tigummigallagaanera aggustip arfineq-pingajuata tungaanut sivitsorneqarpoq.