Toqutsisoq suli paasineqanngilaq

Ilulissani politiit angummik 19-inik ukiulimmik toqutsinermut atatillugu Naalagaaffimmi politiit qullersaqarfiannit immikkut ilisimasalinnik aggersaapput.
Allattoq Medea Frederiksen
maajip 09-at 2011 10:03

Toqutsisoq aamma aallaat toqutsinermi atorneqartoq politiinit suli nassaarineqanngillat.

Pinerluttoqarsimatillugu misissuisartut toqutsiffiusumi misissugassanik tigooraapput, taakkulu Danmarkimut misissugassanngorlugit nassiunneqassapput.

Toqutsisoqarsimatillugu paasiniaasartut Naalagaaffimmi politiit qullersaqarfianneersut aamma aggersarneqarput.

Taamatuttaaq toqunikunik misissuisartoq Danmarkimeersoq toqutaasimasup timaanik aqagu misissuissalluni.

Angut inuusuttoq timimigut ikilerneqarsimalluni napparsimavimmut arfininngornermi ullaakkut eqqunneqarmat peqqinnissaqarfimmit politiit kalerrinneqarput.

Toqutsinermut atatillugu takunissimasinnaasut arlaatigulluuniit pisoq pillugu ilisimasallit Ilulissani politiinut saaffiginneqquneqarput oqarasuaat 94 32 22-mut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq