Toqutsisimasutut pinngitsuutinneqartoq
Angummut 39-inik ukiulimmut timimik toqungasumik assuarnartumik ikkatiginnissimasutut eqqartuussineq tupannartumik inerneqarpoq. Tassani unnerluussisussaatitaasup Tobias Bergip 39-inik ukiulimmut unnerluussut tunuartimmagu.
Ilisimannittumut apersuereernerup kingorna unnerluussisussaatitaasup Nunatta Eqqartuussisuuneqarfianut 39-inik ukiulimmut unnerluussut allanngortimmagu pineqartoq pinngitsuutillugu.
Pinngitsutinneqartup 62-inik ukiullip siorna toqutaanerani najuussimasutut takussutissaqannginnera unnerluussisussaatitaasup Tobias Bergip tunuartitsinerminut tunngavilersuutigaa.
Angutip aappaata, 33-inik ukiullip Qaasuitsup Eqqartuussiaviani toqutsisimasutut eqqartuunneqartup, ilisimannittutut nassuiaatai uppernanngitsut pinngitsuutinneqartumut illersuisup Finn Meinelip oqaaseqarnermini oqaatigaa.
Taassumami 39-inik ukiulik toqutsinermi peqataasimanerarpaa, sulialli ingerlanerani 33-inik ukiullip nassuiaatini allanngortissimallugit.
- Suliap ingerlanerani toqutsisuusimasoq 33-inik ukiulik tatiginarsimanngilaq. Politiit suliamik ingerlatsisimanerat pakatsissutigaara, taakkumi sullarlunnerat pisuulluni kukkusumik sullitara eqqartuunneqaqqaaraluarmat. Ersarippoq pineqartup pinngitsuunera, illersuisua Finn Meinel oqarpoq.
AAMMA ATUARUK Angutit marluk toqutsinertik filmiliarigaat