Toqutsisimasutut pineqaatissinneqarnini nangitassanngortippaa

decembarip 09-at 2004 15:23

Angut 19-nik ukiulik ullumi Nuup eqqartuussiviani

Eqqartuunneqarpoq, pineqaatissinneqarninilu ingerlaannaq nunatta eqqartuussivianut ingerlateqqippaa.

Pineqartoq septembarip qaammataani Nuummi neriniartarfiup Dupont og Dupond-ip silataani 17-nik ukiulimmik toqutsisimasutut unnerluutigineqarpoq.

Toqutaasoq alleqqumigut ataasiarluni tillunneqarpoq, uppikkamilu tummeqqanut niaqquminik tuppoq, niaqqumi saarnga putullugu. Tamanna kingorna toqqutigaa.

Unnerluunneqartup tilluisimanini siusinnerusukkulli nassuerutigaa, ullumilu eqqartuussivimmi aalajangerneqartussaq tassatuaavoq sumik pineqaatissinneqassanersoq.

Unnerluussisup piumasaraa angut toqumik kinguneqartumik nakuuserfiginnissimasutut pineqaatissinneqassasoq. Politiit aamma isumaqarput pineqartoq sakkortuumik pineqaatissinneqartariaqartoq, ilaatigut tilluuttartuusimanini pissutigalugu.

Unnerluussisut piumasaat malillugu 19-nik ukiulik anstaltimi qaammatini sisamani inissinneqartussatut eqqartuussiviup pineqaatissippaa, pineqaatisinneqarnerli tamanna 19-nik ukiullip nunatta eqqartuussivianut ingerlateqqippaa.