Toqutsisimasutut pasisaq ukiuni qulingiluani pineqaatissinneqariaannaavoq

Arnap 22-nik ukiullip qitornarsiaminik ataatsimik ukiulimmik toqutsisimanini, ukiuni qulingiluani pineqaatissinneqarsimasunut inissiisarfimmiittussanngorlugu pineqaatissinneqarnissaa unnerluussisut piumasaraat.
Allattoq Mads Lynge
oktobarip 20-at 2009 05:35

Nuup Eqqartuussiviani ilaatigut matoqqasumik ippassaq eqqartuussisoqarnerani tamanna paasinarsisoq, Sermitsiaq nittartakkamini allappoq.

Unnerluussutip allanngortinneqarnissasa, arnap illersuisuata piumasaqaatigaa, tassa toqutsinermik taaneqarani, toqumik kinguneqartumik nakuusernertut unnerluutigineqarnissaa piumasaqaatigigamiuk. Ukiunilu tallimani arfineq-marlunniluunniit pineqaatissinneqarsimasunut inissiisarfimmiitinneqarnissaa piumasaralugu. Arnaq pineqartoq ullumikkut ullup qeqqanut pineqaatissinneqassaaq.

Niviarsiaraq ilisimajunnaaqqasoq Dronning Ingridip Napparsimmavissuanut 2008-mi januaarimi unitsinneqarpoq, ajoquserneqarninilu aqaguani toqqutigalugit.

Timaata misissorneqarneranit nalunaarusiami ilaatigut oqaatigineqarpoq, niviarsiaqqap niaqua ikinnerpaamik natermut pingasoriarluni anaartaanneqarsimasoq.

Arnaq 22-nik ukiulik toqutsisimasutut januaarip arfineq-pingajuanni politiinit tigusarineqarpoq. Arnap tarnimigut marloriarluni misissorneqartussaanera aamma nakorsat eqqartuussinermi siunersiorneqartartut oqaaseqaateqarnissaat pissutigalugit suliaq ukiuni marlungajanni suliarineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq