Toqutsisimasutut pasisaq sapaatit akunnerni sisamani tigummigallassanngortinneqarpoq
Aasianni toqutsisimasutut pasisaq, 25-nik ukiulik, politiinit suli killisiorneqarsinnaanngilaq. Arnap taassuma tarnimigut qanoq issusaa pissutigalugu, Aasianni Eqqartuussisoqarfik Qaasuitsumi inatsit tunngaviusoq naapertorlugu ippassaq aamma killisiorneqarsinnaasimanngilaq.
juunip 17-at 2013 10:11
- Arnaq qaqugu killisiorneqarsinnaanersoq nakorsat nalilerumaarpaat, unnerluussisussaatitaasunit, Tanja Søderlund, oqarpoq.
Arnaq 25-nik ukiulik immikkut pissutilimmik juulip ulluisa aqqaneq-aappaata tungaanut nakkutigineqarallarpoq, taamaattoq politeeqarfimmi isertitsivimmiunngitsoq, napparsimmavimmili. Dronning Ingridip Napparsimmavissuanut ullumi nuunneqassaaq. Arnap 25-nik ukiullip angut 29-nik ukiulik Aasianni savimmik arfininngormat kapigamiuk toqutsisutut unnerluutigineqarpoq.
Angut napparsimmaviliaanneqaraluarpoq, ikinili kinguninngua toqqutigalugit.
