Angut 25-nik ukiulik Kangaatsiap pigisaani Attumi toqutsisimasutut pasineqarluni sapaatit akunnerini sisamani tigummineqalerpoq. Angut nukkaminik 20-nik ukiulimmik toqutsisimasutut pasineqarpoq, Atuagagdliutini ullumi saqqummersuni taama allassimavoq.
AG naapertorlugu, toqutaasup pasineqartullu ilumut qatanngutigiinnerinik paasissutissat ilumoornersut ilumuunnginnersulluunniit politiinit uppernarsarumaneqanngilaq.
20-nik ukiulik pingasunngornermi novembarip ulluisa aallaqaataanni unnuami toquvoq, angajualu 25-nik ukiulik tigusarineqarluni Aasiannukaanneqarluni tassani killisiorneqarpoq.
Killisiuinermi toqutsisimasutut unnerluussaanini 25-nik ukiullip akueriumanngilaa.