Toqutsisimaneq suli misissuiffigineqarpoq

Nuummi sapaatip-akunnerata naanerani 58-inik ukiulimmik toqutsinerup kingorna Nuummi politiit naalagaaffiup politiivisa pinerluttoqarsimatillugu misissuisartuinit ikiorneqarnialertut, politeeq Bjørn Bay nalunaarpoq.

Naalagaaffiup politiivini sulisut marluk Danmarkimit Nuummut ippassaq tikipput. Ullumi aqagulu toqutsiffiusumi misissueqqissaarput.

Inuit assaasa ipaat toqutsiviusumilu aak misissorneqassapput. Aamma aak inummit ataatsiminngaanneernersoq imaluunnit arlalinninngaanneernersoq paasiniarneqassaaq, taamatuttaaq kia aagineraa paasiniarneqassalluni.

Toqungasup timaanik misissuisartup Aarhus Universitet-imeersup toqungasup timaanik ippassaq misissuinini naammassivaa ullumikkullu misissugassat assigiinngitsut misissorlugit.

Toqungasup timaanik misissuineq toqutsiviullu misissorneqarnera qaammatip tulliata ingerlanerani suliarineqassasoq Bjørn Bay oqarpoq.

Angut 58-inik ukiulik Nuummi inissiat ilaanni arfininngornermi unnungaatsiartukkut kaportinnermi kingunerisaanik toqungasoq nassaarineqarpoq. Angutip inooqataa arneq 39-nik ukiulik toqutsisimasutut pasineqarpoq sapaatip-akunnerinilu sisamani tigummigallagaalluni. Arnaq pinngitsuunerarpoq.